[أسيل رزق]

المشاركة الأصلية كتبت بواسطة ahmed hesham mohamed

السلام عليكم ورحمه الله وبركاته

انا احمد لسه جديد ف المنتدى ورايح تانيه ثانوى

انا مش عاوز ازعجكوا والله بس انتوا جيتولى نجده من عند ربنا

مشكلتى هى ان انا كنت شاطر جدا وكنت بجيب درجات عاليه خالص فى كل السنين من اول ما بدأت دراسه

وكنت بطلع من الاوائل
بس فى تالته اعدادى لقيت نفسى مع اصحاب بياخدونى للعب وعدم المذاكره والموضوع استمر لحد دلوقتى

وجيبت فى تالته اعدادى واولى ثانوى درجات وحشه خالص خالص خالص

ومشكلتى بقى انى بقيت مش بعرف اقعد على الكتاب وحاسس ان تانيه ثانوى دى طويله اوى وممله

وحاسس ان انا مهما ذاكرت فى الاخر مش حجيب حاجه وثقتى بنفسى بقت صفر وبالاخرين كمان


ارجوكم ارجوكم ارجوكم اى حد يساعدنى والله حكون شاكر ليكم اوى وربنا يسعدكم ويوفقكم
مع العلم يا جماعه ان صحابى دول فيهم واحد معايا من زمان وشاطر خالص كنت انا وهو لوحدنا بس بعد كده
اتصاحبنا على اتنين مش بيذاكروا خالص وضيعونا معاهم وانا مش عارف اسيبهم او ما اسيبهومش ولو سيبتهم اسيبهم ازاى؟

اخوكم فى الله احمد

وعليكم السلام ورحمة الله وبركاته

أهلاً بيك معانا فى المنتدى

بالنسبة للمشكلة واضح إنك قبل 3 إعدادى ماكنتش بتلعب أو ماعشتش طفولتك أوى علشان كده أول ما لقيت اللعب و الذى منه دخلت فيه و بقيت بتعوض اللى راح منك فى المذاكرة

بالنسبة لأصحابك الى بتسأل أسيبهم ولا لأ .. فا الطبيعى إنك تسيبهم يعنى تخلى علاقتك بيهم سطحية و لما يقولولك تعالى نروح المكان الفلانى إعتذرلهم و وضح اسبابك بعيد عن إنك عايز تذاكر

بالنسبة لصاحبك اللى بتقول إنه شاطر لو هو لسه شاطر يبقى لازم تقوله إنكم تبعدوا عن أصحابكم التانيين و تشجعوا بعض على المذاكرة

نيجى بقى للمذاكرة و المشكلة الأكبر .. بما إنك إعترفت إنك غلطان و حاسس بخطورة المشكلة فا ده هيسهل إنك ترجع شاطر زى الأول بس عايز شوية مجهود منك

لازم أول حاجة تفتكر كل ما تتخنق من المذاكرة إنك لو مذاكرتش هيكون يوم النتيجة لا قدر الله أكتر يوم نفسك تنساه فى حياتك و تخيل بيتكم و هو كله حزن و ضيق من النتيجة و تخيل برده لما تذاكر و تجتهد البيت هيكون مليان فرحة و جمال و يبقى أسعد أيام حياتك

و حاول على قد ما تقدر تقنع نفسك إنك بتتسلى أو بتلعب مش بتذاكر أو مجبر على المذاكرة .. إعتبر المذاكرة جزء من اللعب

لما تزهق من المذاكرة كتير و بدل ما كل شوية تقوم من على المذاكرة خليك فى المكان اللى بتذاكر فيه سواء على المكتب او فى أى مكان و ارسم أو شخبط أو اكتب اى حاجة أو اقرا مجلة .. إلخ ، و بعد 10 دقايق إرجع ذاكر تانى

و لما تتخنق خالص بقى خلى قوم إتوضا و صلى ركعتين أو إعمل البريك بتاعك وقت الصلاة

حاول تنجز جزء كبير من المذاكرة علشان لما تزهق و تقوم من على المذاكرة تكون أنجزت جزء كويس منا للى عليك

آسفة على تأخيرى فى الرد .. كتبته مرتين و النت فصل

يا رب أكون قدرت اوضحلك نقط اساسية تمشى عليها و أكون قدرت أفيدك بشىء

و ربنا يوفقك