[أسيل رزق]

مع إحترامى لكل الناس
بس اللى حصل مايستدعيش الكلام الكتير اللى إتقال ده
شيخ الأزهر قال إنه راح مدرسة إبتدائى و لقى بنت لابسة نقاب بالرغم إن مكنش موجود فى الفصل لا أولاد ولا رجالة !!
و حب يضحك معاها لما قالها اقلعى النقاب و قالها لو كنتى حلوة شوية كنتى عملتى إيه ؟؟
يعنى لا راح جامعات ولا معاهد و لا حتى مدرسة إعدادى و لا عاكس البنت ولا أجبرها على كشف وشها !!
لما طفلة تلبس نقاب من سن صغير دا كبت لطفولتها و مشاعرها .. مش بعيد تبقى معقدة نفسياً طول حياتها

رغم إنى سمعت خبر إمبارح بعدم دخول لجان الامتحانات فى الجامعات المصرية بالنقاب و حسيت إنهم زودوها أوى بس المصريين طول عمرهم ماشيين بدماغهم يعنى حتى لو نزلوا قرارات مش هيقدروا ينفذوها 100%

و بعيداً عن كل ده هما بيلغوا النقاب حبة بحبة فاكرين إنهم بيضربوا عصفورين بحجر
يقولوا إحنا بنعمل كده علشان الفساد اللى انتشر بسبب النقاب .. و هما مش غلطانين فى ده لإن جرايم كتير بتتنفذ بالنقاب حتى لو كانوا إرهاب دا غير إن فى بنات كتير بيلبسوه منظره و بس تلاقى البنت راسمة عنيها و لابسة عباية حرير و بتلمع أو كاشفة إيديها و ملونة ضوافرها أو لابسة مع الأسود ألوان لافتة للأنظار زى الأحمر و الفوشيا و غيره
و فى نفس الوقت الحكومة بتاخد أوامر من برا أو من اللى فوق زى ما بيقولوا علشان الحركة الدينية فى مصر تختفى بالتدريج

و فى الأول و فى الأخر اللى عايزة تلبس النقاب محدش هيقدر يمنعها ولا هترضى إنها تسيبه
و لو قلعته يبقى هى أصلاً مكانتش مقتنعة بيه