موضوع رائع يا تسابيح ونظرة واقعية ومهمة
كانت عجبتني أوي مقولة من حكيم نينجا في فيلم علي ما أذكر اسمه إلكترا
كان بيقولها " ليس كل الدروس تُعَلّم بل يجب أن نعيش بعضها لنفهمه "
من جِهه الآباء فالأب بلا شك عايز ابنه يبقي أفضل واحد في الكون .. والوحيد اللي يتمناه الرجل إنه يبقي افضل منه هو إبنه او ابن ابنه .. لكن للأسف طريقة التعامل وطريقة التوجيه هي المُشكلة الحقيقية
إسلوب الوعظ مش بينفع في كل الأحيان .. إنما إسلوب التوجيه والمُشاركة هو الأكثر جدوي علي الإطلاق
كمان التوجيه ميبقاش كله مُنصب علي إني اخلي الولد مثالي او البنت مثالية وأربيهم علي " الزمن الجميل " لما كان الراجل راجل والست ست
سيدنا علي بن أبي طالب - كرم الله وجهه - قال " لا تربوا أبناءكم علي أخلاقكم فإنهم خُلِقوا لزمنٍ غير زمانكم "
هنا بقي الحكمة .. إني أخليه شخص كويس ورزين وفي نفس الوقت ميتعارضش مع العالم من حواليه .. هنا مقصدش المسائل اللي لا نقاش عليها ولا جدال زي الأدب والاخلاق .. لا ابداً .. الأخلاق أخلاق في أي وقت وفي أي مكان والخير ليس كما يري بعض الفلاسفة إنه نسبي .. لاء الخير ثابت ويقيني طالما نتايجه " مبتضرش بحد .. وبتفيد الفرد والجمع .. وآثاره مُستمره وجيدة في البيئة المؤثرة " .. مش دي نقطتنا
انا بتكلم عن نقطة إننا مينفعش نربي ولادنا علي زمانا إحنا هيحصلهم مشاكل كتيرة وعرقلات كتيرة جداً .. إنما أنا أصاحبه .. أشاركه .. اوجه طاقته واستثمره بكدا هيقولي كل أسراره .. هيكلمني براحته .. أدني مُشكلة هتحصل معاه هيجي يحكيهالي ( طول ما حاسس إن عقلي مواكب العصر )
الحمدلله والدي صديقي
وانا شايف إن الموضوع له آثار لا بأس بها بالنسبالي
---
النقطة التانيه الأهم من ذلك الأم
دي مُرتبطة بعصب الأمة وسر قوتها وسر ضعفها وسر انحلالها وسر رقيها الأخلاقي
إنسانة تقدر تُفسد ربع المُجتمع وأربع نساء يستطيعن إفساده بالكامل مع التسلسل
يعني ( واحدة ) تقدر تُفسِد أخوها / تفسد زوجها / تُفسد جارها / تُفسد ابنها / تُفسد اقاربها
وتقدر تصلحهم في نفس الوقت
لما أنا اربي بني آدمه علي إنها عايشه لوحدها وملهاش حد تفرغ فيه أسرارها وتستقي من حكمته او يفكر معاها .. مع اول كلمتين بودنها الضعيفة هتفلت وتضيع
بس الحمدلله بردو لسه شايف بعض النماذج اللي مصاحبها امهاتها وبيحكوا في كل صغيرة وكبيرة
وياريت بجد تزيد بلاش نبعد البنات خصوصاً عنا
شكراً يا تسابيح علي الموضوع الجميل
وآسف بشدة علي الأطالة
