للاسف يا جماعة استحملوني بليز انا رغاي

واولا واخيرا والله بشكر اختي الدكتورة فلاور على طرح الموضوع


دلوقتي هتكلم عن البيولوجي


منهج البيولوجي عبارة عن ثلاث ابواب هي ( الباب الاول ) دا بيتكلم في الوظائف الحيوية لجسم الانسان


( الباب الثاني ) الوراثة


( الباب الثالث ) dna الحمض النووي الريبوزي وبرضو الديؤكسي ريبوز


بسم الله نبدأ تقسيمة المنهج


الباب الاول الاطول واللي كله تقريبا يعتمد على شئ اسمه ملكة الحفظ

يتقسم الباب الى ثمان فصول وهيه ع الترتيب

1- التغذية : دا بيتكلم عن طرق التغذية من ذاتية وغير ذاتيه & ذاتية زي النبات وهتاخدوا فيها بأى كيفيه امتصاص الماء والاملاح من التربة وتكوين الورقة وعملية البناء الضوئي والنقل النشط حاجات جميلة قوي قوي والمغذيات الكبرى والصغرى من الاملاح

والتغذية الغير ذاتية الانسان هتاخدوا تركيب الجهاز الهضمي كاملا فم - مرئ - معدة - امعاء - كبد

وهتاخدوا العصارات الهاضمة وانواعها وبتعمل في وسط حمضي ولا قلوي

وهاتخدوا الايض ( الهدم والبناء) اخر صفحة في الفصل :D
ادي الفصل الاول ان شاء الله تافه قوي

2- النقل : طبعا في الانسان وفي النبات هتاخدوا في النبات تركيب الجذر والساق وهتاخدوا برضو تجارب والقوى التي تعمل على صعود العصارة من قوى ثانوية

اهم حاجا نظرية التماسك والتلاصق وقوى الشد

وشوية حاجات كدا جميلة قوي


في الانسان رهيب هتاخدوا القلب وتركيبة والاوعية الدموية والجهاز الليمفاوي طبعا كله بسيط

هتاخدوا طبعا الدورات

الدورة الكبرى & دورة البابية الكبدية & الدورة الصغرى
دي دورات النقل في الانسان وحاجات ساهلة تبدأ منين وتنتهي فين وبتصب فين كل دا ان شاء الله هيكون ساهل عليكوا قوي
زهتاخدوا كرات الدم البيضاء والحمراء والصفائح الدموية وكيفية تكون الجلطة كل دا بسيط باذن واحد أحد

3- التنفس : بعتبره فصل شيق قوي هتاخدوا التنفس في الانسان الاول والفرق بين التنفس الخلوي وتبادل الغازات في مقدمة الفصل وهتاخدوا تركيب الميتوكوندريا وكيفية انتاج الطاقة ونواتج عملية التنفس وهتاخدوا حاجا اسمها دورة كريبس وسلسلة نقل الالكترون وجزيئات ال ATP وكيفية ان الانسان بيحصل على الطاقة

وتركيب الجهاز التنفسي وحاجات جميلة جدا

في النبات هتاخدوا اكيد التنفس في النبات كام تجربة بتوضح التنفس في النبات وان شاء الله كل تمام لغاية دلوقتي

4- الاخراج : دا بأى فصل سهل قوي هتاخدوا مفهوم الاخراج وهو عملية التخلص من الفضلات والتي تمر عبر الاغشية البلازمية
وهتعرفي حاجات جديدة ان مثلا في حاجات كانت بتعتبر اخراج في الاعدادي بس دلوقتي لا زي التخلص من ثاني أكسيد الكربون والنيتروجين الجوي بواسطة الرئتين

وبرضو في حاجات كتيرة قوي هتاخدوا الكليتين والكبد ودور كل شئ في الاخراج والجلد كل دا ان شاء الله وجهاز الكلى الصناعي


بعد كدا الاخراج في النبات والنتح وانواعه والادماع ومعناه وليه الاخراج في النبات اسهل من الحيوان والانسان

وتجربتين ع الماشي :D


5- الاحساس : كنت بعتبره ارخم فصل بس طلع رهيب قوي هتاخدي جهاز العصبي المركزي وتحكمه في كل حاجا والجهاز العصبي الطرفي دا بأى جميل هتدرسوا المخ واقسامه والاعصاب الشوكية والمخية والفعل الارادي واللااردي وحاجات حلوة قوي ان شاء الله والفعل المنعكس برضو وتحكم بعض الاعصاب في عمليات وهتاخدوا كيف يتم اثارة الاعصاب والاستجابة كل دا
وحالة الاستقطاب واللاستقطاب والجموح وحاجات كتيرة وتأثير الجهازين السبمثاوي والبارسبمثاوي على بعض غدد في الجسم وبعض الاعضاء

الفصل دا جميل قوي دا بالنسبة للانسان

في النبات الاحساس ساهل قوي هتاخدوا الانتحاء وهو استجابة النبات لمؤثر خارجي ناشئ عن التوزيع المتكافئ للاوكسينات على جانبي القمة النامية

هتاخدوا انتحاء ارضي ومائي وانتحائ ضوئي

وادي كل الحكايه :D

6- التنسيق الهرموني : دا بأى احسن فصل درسته في حياتي في البيولوجي لحد الان هتدرسوا دور الهرمونات من عادية وجنسية والانسولين كل حاجا هنا والغدد القنوية واللاقنوية هتاخدوا الغدة النخامية وبيسموها المايسترو وبرضو فيه الغدة الكظرية والبنكرياس " غدة مشتركة"
حاجات جميلة قوي

هاتخدوا بأى في النبات الاوكسينات وساهلة قوي اندول حمض الخليك وكدا ونافثول حامض الخليك حاجات بسيطة قوي ان شاء الله خير.....

7- الدعامة والحركة:

في النبات بأى هتاخدوا دعامة تركيبية وفسيولوجية والفرق بينهم أكيد والحركة في النبات حركة الشد والمحلاق حاجات بسيطة قوي

تدخلوا ع الانسان الدعامة والجمجمة والطرفان العلويان والسفليان وبرضو هتاخد حاجات كتيرة زي نظرية الخويط المنزلقة للعالم هكسلي في شرح تركيب العضلات وبروتينات العضلات اللي هما الأكتين والميوسين

وحاجات جميلة والله وحلو الفصل دا في رسوماته

8- التكاثر : وهو يعد اطول فصول المنهج

هتاخدوا التكاثر الجنسي واللاجنسي

التكاثر في النباتات الزهرية وتكوين حبوب اللقاح والبويضات وعملية الاخصاب وتكوين البذرة والثمرة وحاجات جميلة وسهلة جدا
التكاثر في الانسان : ساهل قوي بيتكلم عن تكوين كل من جهاز التناسلي لكل من الذكر والانثى وشرح لوظيفة كل تركيب في الجهاز ووظيفته

وتكوين الحيوانات المنوية والبويضات ودورة الحيض ودورة التزواج في جميع الكائنات

برضو هتاخدوا التؤام وكل دا كلام رهيب قوي وسهل جدا ومعلومات عادية قوي

برضو هتاخدوا زراعة الاجنة والتكاثر العذري والاثمار البكري وبنوك الامشاج وحاجات تانيه في الفصل بس في الاخر

وتحديد الجنس في الحيوانات كل حاجا باذن الله


************** كدا خلص الباب الاول ( تم بحمد الله )*********************


الباب الثاني : علم الوراثة


طبعا العالم جريجور مندل

تلات فصول وهم

1- الاول بيتكلم عن قانون مندل الاول والتاني وهما سهلين قوي وصفات اليلومورفية حاجات بجد جميلة قوي ونبات بسلة الزهور ووراثة صفة واحدة ووراثة صفتين وحاجات مباشرة مندل الاول والتاني ونجاح تجارب مندل وسبب كل دا

2- رهيب قوي قوي فيه كل الشغل هتاخدوا الجينات المتكاملة والجينات المميتة والجينات المتبادلة والارتباط التام وغير التام والعبور وحاجات جميلة قوي قوي قوي

ومعامل ريسس ووراثة فصيلة الدم في الانسان حسب توزيع منطقي وحاجات شيقة جدا جدا واخر حاجا رسم الخريطة الصبغية ودور العالم مورجان سهلة قوي

3- الوراثة الجنسية بتتكلم عن التركيب الجنسي للشخص السليم سواء ذكر او انثى وحالات الشذوذ زي كلاينفلتر وداون وتيرنر والتضاعف الجنسي

برضو فيه مسائل الصفات المرتبطة بالجنس والصفات المتأثرة بالجنس وطبعا المقارنة بينهم


**********************_ تم بحمد الله الباب التاني _ *********************


الباب الثالث : DNA

الفصل الاول سهل قوي وبيتكلم عن المحتوى الجيني وكلام من دا كله وتركيب ال DNA حاجات جميلة قوي قوي عاوز تركيز جامد الباب دا لانه في حاجات كتيرة شبه بعضها وحلو قوي الفصل الاول والتاني وهتاخدوا برضو تركيب ال RNA وكيفية تخليق البروتين حاجات شيقة الجينيوم البشري ومعلومات كتيرة قوي وازاي يتم انتاج هرمون طبيعيا زي الانسولين وانزيمات القطع وبيكتريا ايشيريشا كولاي ودورها حاجات بجد شيقة جدا




والحمد لله بكدا منهج البيولوجي وهو عبارة عن 13 فصل

اسأل الله ان اكون كتبت ولو شئ بسيط يفيدكم

لاني والله مش متذكر كل حاجا وانا بكتب اللي فاكره ودلوقتي مش مركز

نسأل الله ان يوفقكم وان يسدد خطاكم وان شاء الله بالنجاح والتفوق والتميز

سلام الله عليكم


ولو اي حد عاوز مني اي حاجا انا تحت امره بجد طريقة مذاكرة بيولوجي فيزيكس او عربي او انجليش او مادة الادبية تحت امره

استودعكم الله

واسف يا دكتورة بس بجد انا نفسي اساعد ولو بشئ بسيط ليهم لاني اخدت دروس ياما ف الثانوية العامة ربنا معاكم وبدعيلكم من كل قلبي