اقتباس:
المشاركة الأصلية كتبت بواسطة الباش مهندس
السلام عليكم ورحمة الله وبركاتة
تقبلوا فائق احترامي وتقديري لكل من ساهم في هذا الموضوع الجميل
انا مشكلتي بكل بساطة يا جماعة هي اني كنت لحد 3 اعدادي كدة ماشي زي الفل
وفجأه !!!
مشكلة جامدة جدا حصلتلي
بسبب الانترنت
مش هقولكم شات بقا ولا بنات ولا غيرو
الموضوع بكل بساطة هي لعبة
لعبة علي الانترنت تسمي كونكر اون لاين
صينية المنشأ
مفيش حد بيلعبها الا ويدمنها
ودا طبعاً بسبب الجيرافيك ووسائل الجذب الجامدة جداً اللي موجودة في اللعبة
وفضلت اولي ثانوي كلها مع اللعبة وبقيت مش بروح معظم الدروس ودا قصر عليا طبعاً
وخلاني جبت درجة زفت في اولي ثانوي
وقولت ابطل اللعبة وانتبه بقا شوية لمذاكرتي ومستقبلي
ومفيش كام شهر ورجعت لام اللعبة دي تاني
ولحد دلوقتي لسة بردوا معلقة معايا علي الرغم من اني بدأت اقلل منها شوية
بس بردوا
انتو مش هتتخيلو يعني اية الواحد وهوا بيذاكر مش منتبه للمذاكرة خالص ومش بيفكر غير في كونكر بس
كونكر .. كونكر .. كونكر
انا زهقت والله يا جماعة ولازم تشوفولي حل في الموضوع دا
انا نفسيتي تعبت جدا منها
ومش قادر ما افكرش فيها
ودا لان كل اصحابي بيلعبوها بس انا مش عارف هما بيلعبوها عشان يبعدوني انا عن المذاكرة ولا اية
هما شاطرين جدا ودا بيبان طبعاً في امتحانات الحصص والشهور في الدرس
وانا مستوايا عمال بيقل كل شوية اكتر من اللي قبلها
يا ريت يا جماعة حد يقدر يساعدني هنا
وانا اسف اسف اسف ان كنت طولت عليكم او شغلت بالكم بموضوعي حتي
وتقبلوا فائق احترامي مرة اخري |
وعليكم السلام ورحمة الله وبركاته
أنا عايزة أقول إن الألعاب دلوقتى بقت العن من الشات و المنتديات فى ادمان الشخص ليها
لإن فى حياتنا عمرنا ما شفنا ألعاب فى صغرنا زى دى فا إندهاشنا ليها خليتنا ليل نهار عليها
حل الحكاية دى هى الإرادة .. لو الواحد عنده إرادة و عزيمة إنه يبعد عن اللعبة اللى مدمرة حياته هيقدر
بس حاول إنك تشغل نفسك بحاجة تانية أو حط حبك كله بإرادتك فى حاجة مفيدة زى القراءة مثلاً حتى لو مش بتحب القراية لازم تحبها شيل من عقلك فكرة كره الشىء و حبك ليه .. حب اللى هيفيدك و إكره اللى هيضيعلك وقتك زيادة عن اللزوم
بس إبدأ واحدة واحدة يعنى ماتبطلش اللعبة مرة واحدة أحكم نفسك ب3 ساعات فى اليوم مثلا لمدة 3 أيام أو اسبوع و بعد كده خليها ساعتين لمدة معينة وبعدين ساعة و حاول بقدر المستطاع تملا وقتك بأى حاجة تانية مفيدة على الأقل اقعد من أهلك أو شوف اصحابك حتى لو هتتفرج على التليفزيون بس أهم حاجة إنك تبعد عن اللعبة نهائى و تشيلها من دماغك و فكر دايماً إنك لو رجعتلها هتدمر حياتك
و إن شاء الله تكون عندك الإرادة و ربنا يعينك على التخلص من إدمان اللعبة دى
وربنا يوفقك