السلام عليكم و رحمة الله و بركاته
الموضوع جمييل فعلا و يستاهل المناقشة بس مهما قلنا مش هنوفيه حقه
المهم
بعد اذنكم ممكن اشارك؟طيب ميرسى
--------------
بالنسبة للتعليم فى مصر:
المناهج اللى احنا بندرسها للأسف قشور
كمان مفيش اى تجهيزات فى المدارس نهائى
انا كنت فى البحرين لحد سنة 4 ابتدائى
بس هناك محدش كان بياخد دروس
انا معرفتش يعنى ايه دروس غير لما جيت مصر على فكرة <_<
هناك الفصول مكيفة
بتعمل تجارب عملى بإيدك
فى مراجعة باستمرار على المدرسين اللى فى المدرسة
مدرسين الانجليزى بيجيلهم مراقبين من بريطانيا
----------------
طبعا احنا عندنا محدش بيروح المدرسة
عن نفسى انا فى ثانوية عامة مكنتش بروح ولا كل الناس اللى فى ثانوية عامة
لأنى و اثق لو كنت رحت مكنتش جبت مجموعى ده
طبعا كنت باخد دروس فى كل المواد
لان مفيش مدرسين فى المدرسة بيدوك زى مدرس بره
مدرس بره مش بيسيب نقطة صغيرة غير لما بيقلك عليها دا باستثناء بعض المدرسين المحترمين0
أمال الناس اللى جايبة 410 من 410 من غير مستوى جايباها ازاى؟
ولو انى اشك فى الدرجة دى
ما علينا
انا جايب 407.5 من غير مستوى بس طبعا لانى كنت باخد دروس + مكنتش بروح المدرسة
المهم
لو عايزين نطور التعليم فعلا
يبقى نشوف ليه الطلبة مش بتروح المدرسة
يعنى هنقارن بين حاجة بسيطة قوى
ليه طالب ثانوى مش بيحب يروح المدرسة
بس بيحب يروح الجامعة؟
لأن الجامعة الى حد ما فيها حاجات ممكن تشجعه و لو ان فيها نقص فى التجهيزات برضه بس هيا بتشجعه الى حد ما
كمان لازم المناهج تتطور من الأول للاخر
يعنى منهج رابعة هندسة مثلا
يكون اساسه منهج اولى ابتدائى
بحيث ان كل سنة تكمل التانية
ويكون الشغل عملى
مش كلمتين نظرى
ولازم نموذج اجابة
ولو الطالب خرج عن النص بكلمتين
المصحح يشيله الدرجة كلها
وممكن تكون المعلومة الصح اللى الطالب كاتبها المصحح نفسه ميعرفهاش
كمان احنا عندنا حاجة وحشة اوى
ان كل سنة فى حاجة اسمها تعديل للمناهج و هو فى الحقيقة تبويظ
يعنى ممكن يكون التعديل ده له مزايا و عيوب
بس هو لما بيجى يعدل
بيحط اى حاجة
والأساسيات بيشيلها
------------------------------------------
يلا ما علينا
بس على فكرة
كل أوائل الثانوية العامة كانوا بيعتمدوا على الكتاب المدرسى و بيروحوا المدرسة و بياخدوا شهادات تقدير من كى جى ون زى ما واحدة منهم السنة دى قالت كده
معرفش ازاى(طبعا محفظينهم كلمتين
)
--------------------------------------
كمان مشكلتنا ان الخريجين كتيير
وظائف العمل قليييييييييلة جدا
بمعنى لو احنا عملنا الثانوية العامة مرحلة منتهية
وقلنا لكل طالب روح الكلية اللى انت عايزها
كل الناس هتروح هندسة و طب و صيدلة....
بس انا من رأيى ان لازم تكون فى اختبارات تأهيل زى النظام الأمريكى بالظبط
عموما للكلام بقية و محدش يفتكر ان بكلامى عن البحرين و النظام الامريكى ان معنديش انتماء
لا انا بقارن بس
وانا نفسى والله حال البلد دى ينصلح و معدوش يحطوا امتحانات ثانوية عامة غلط هيا و نماذج الاجابة
وللكلام بقية ان شاء الله و شكرا على الموضوع.