ياعم المتحضرسيب الناس تشكى وتحكى عن أحوالها
واذا كانوا عار ع التعليم ياريت تقدر تسد مكانها
وحرية الرأى للجميع وانت بكلامك قطعت وصالها
الملافظ سعد ياعبد العال وانت بكلمه سقيتنا مرارها
والأمم إزاى هتنهض بس والتكبر مالى كيانها
لازم ياناس نحترم الكبير ونفتح الطريق لشبابها
مش نقعد فى قصر عالى ونحكم ع الناس من مشاكلها
ساعات الاه بتكون من جاه حواليه كونسلتو بيشفى ألمها
وكتير بتكون من ابن يتيم والقرش مخاصم أسرته بحالها
ياعم إنزل هنا وسطينا وتعالى بلدنا وشوف أحوالها
من حبى فيك رديت عليك وبلاش تظلم مصر وناسها
ولو كنت مصرى مصرى صحيح تعالى نكسر صخر جبالها
هنقدر؟ طبعا نقدر لما نشعر إن دى بلدنا واحنا فرسانها
وكل حريه وليها مساوىء وكل حريه وليها محاسنها
بس احنا نخلص لبعض بجد وبإيد واحده نقيم أركانها
وادى الدليل واضح قدامنا إن احنا بدينا فى مشوارها
وتعيش مصر أمه واحده متوحده بمسلميها وبأقباطها
وكل عام وانتم بخير ومصر أم الدنيا ربنا يصونها
|