للراحل فؤاد حداد
كاوبوي دينامو.. سابق غنمه
علق يافطة بعرض الريف
خللي أمريكا تستعمركا
ست شريفة غرضها شريف
يوم ما بترمي عقب سيجارة
تفتح بيه توريد وتجارة
شق الحوصلة.. اكسر بصلة
نخ وطاطي تبقي ظريف..
كاوبوي دينامو
خليك جني ولد جنية
شيل من راسك الوطنية
نضف مخك إلا نطخك
خليه خالي من التخاريف..
كاوبوي دينامو
لها في اللعب فنون وبراعة
في مشاريع وبنوك وزراعة
تقتل تقتل تقتل ست غنية عن التعريف
.. كاوبوي دينامو
اطلع علي مركبها النفطي..
قولها خدي خلجاتي ونفطي..
دي المحبوبة جتك غيبوبة مدرسة حرة بالمصاريف
. كاوبوي دينامو..
حط دماغك تحت جناحها..
ارضع في البزازة منحها..
بكرة تبيت راقد ميت
كيف الغاوي مع الحريف..
كاوبوي دينامو.
|