في البدايه احب اقول اني كنت عايشه في الامارات و مازلت يعني بس انا حاليا في مصر عشان الدراسه الجامعية...انا هقول رأي بصراحة...كل واحدة منهم ليها مميزات و عيوب...خلينا ايجابيين و نبتدي بالمميزات...هناك طبعا اول حاجه بتلاحظها...النضافة...النضافه في كل شىء في الشوارع...في الأزقه (مع ان هناك مفيش ازقة كتير اوي يعني)بس الشكل العام يوحي بالنضافه...تاني حاجة النظام...النظام موجود في كل شىء...المعاملات الحكومية كل واحد له رقم و بالدور من غير زحمه و لا طوابير بالعكس ده بيبقى في مبنى اخر شياكه و مكيف كمان عشان الحر هناك يخنق
...طبعا دي مش كل المميزات بس دي نبذه...العيوب...ان هناك الواحد بيحس انه متكتف...مينفعش يروح و ييجي براحته...مينفعش يمشى في الشوارع...كل حاجة بالعربية...الفسحه عندنا اننا نمشي في شوارع المول...انا مش معترضه طبعا بس الواحد بتوحشه الشوارع الحقيقيه...كمان هناك دايما محاط بجنسيات كتييييير...و ثقافات و عادات كتييير...و نادرا ما تلاقي عربي...و شحيحا ما تلاقي حد من اهل البلد نفسها...ده معناه ان كل معاملاتك بالانجليزي...الانجليزي في حد ذاته مش مشكله بس احنا يا جماعه عرب و في دوله عربيه..و هي دي المشكله ..ان هما مبهورين بالغرب..عايزين يقلدوا كل حاجة...التعليم هيئلبوه كله انجليزي...يعني مفيش حد هيتعلم عربي...الكتب مترجمينها من المناهج الامريكية و البريطانيه...كل المناصب العليا و المهمة اللي ماسكها اجانب...ايا كانت جنسيته...امريكي بريطاني اسكوتلندي الماني كندي فرنسي اي حاجه...دول حته لما يعرفوا انك عربي معاك جنسيه اوروبيه...يشيلوك من على الارض شيل...اشي مرتب قد كده...و بدل سكن و بدل اثاث و تذاكر طيران ببلاش و من ده كتير لكن العرب هناك...حسرة عليهم...اللي معاه بكالوريوس تجاره و واقف حراسه على باب مدرسه...و اللي معاه دبلوم و واقف في مخبز من 6 الصبح لحد 1 بليل...اي نعم مفهوم المخبز هناك غير هنا...المخبز هناك عبارة عن ميني هايبر ماركت...بس ولو...اما بالنسبه لمصر...و على الرغم من كل العيوب و كل الصعوبات اللي بواجهها في مصر من مواصلات و الرغبة في استنزاف الشخص اللي راجع من الخليج...و الافكار اللي بتدور في افكار الناس في الكليه عن ازاي اني اخدت مكان واحد في الكليه كان يتسحقه اكتر منى بس لانى معايا الثانوية الاماراتيه التافهة التي لا تسوى شىء مقارنه بالثانوية المصريه...على الرغم من كل ده...فمصر هي بلدي...امي..يكفي تشوفوا نظرة الاحترام في عيون الاماراتيين لما يعرفوا اني مصريه...انا مش هقدر لقول كلام اكتر من اللي الاستاذة شيماء قالته...مصر هياا امي..نيلها هوا دمي.....