[الشاعر/محمد علي]

بتوحشينى
لما يجيى الليل ينام فوق السطوح
وبتندهينى وباسمعك
أبقى مَعِك
بس آه منها الجروح!
بينى وبينك خطوتين
واقفين ولا بيتحركوش
بينى وبينك سكتين
ماشيين ولا بيتوقفوش
بينى وبينك قلب تاه
وحشاه
حيـــاه
ماتموتوش
بينى وبينك قصه حلوه
بدايتها نظره
نهايتها ذكرى
ألقاكى فيها
وألقاها فيكى
ألقاكى بيا
والقانى بيكى
بينى وبينك بحر شوق
عمّال يزيد
غرقان انا مش لاقى طوق
أو حتى إيد

أنا مش لاقيكى
ولا لاقينى
بدارى فيكى حيرة سنينى
بدارى عنك غربتين

ياللى فاكرانى وفاكرة
تنسى نفسك إنى بَحبك
ياللى فاكرانى وفاكرة
تِقسى قلبك لو يوم قَابلتك
ياللى فاكرانى وفاكرة
تِزيدى هَجرك وتِزيدى عِندك
ياللى فاكرانى وناسيه
إن أنا لسه بحبك
وان قلبى هوّ نفس القلب اللى
يوم ماشافك
يوم ما عِرفك
يوم ما حَبك
يوم ما حَب العيشه جَنبك
يوم ما غِبتى عنهُ لحظه
يوم ما راح يِشكى الليالى
هوَّ نفس القلب هوَّ
يوم ما بعتيه واشتراكى
يوم ما سبتيه وارتضاكى
يوم ما سافرتى وسبتى حيرتى مستنياكى
لا قولتى فين إنتى ولا سبتى الدليل
وبتوحشينى