[الشاعر/محمد علي]

نقشوا الحروف ف جدران المعابد
حروف سمرا
ومليانه حنين
متعطرة بسحر السنين
متكحلة بكحل الحقيقه
والحقيقه انك إزيس
واقفه وحاضنه نور الشمس ليها
جوه ليلها شراع أصيل
فارد جناحه يضم قلبى
يكتبنى ويرسمنى حروف
تسكر كاسات جوه نبات بردى
وابات انا وهمى
شاعر انا وعنيكى كانت ملهمه
لبحور قصايد
تغزل ضفاف النيل وتر
وعنيكى لحن
واحنا السكارى
كاتبين على جدار الزمن
سيرة همومنا
متصوره ف احجار كتابك
والكتاب مكتوب بقلبى
داير أخبى عن عنيكى انى دايب
دايب وقلبى مش بإيدى
دايب وفى عنيكى الوطن
انتى الوطن