عشان يعدى القطر
شعر /سمير الأمير
الخلق صاحيه النهارده بتحسب الحسبه
والسوق بوااقى برتقان ولمون
وكان زمان البرتقان ع الشجر
وكان زمان مواويل
00000000000
لوعشت انا ف الذاكره مين اللى يسعى على عيالى
الفكره حلوه قوى بس السؤال علقم
إدينى عقلك يا عصفور الجنان
خبط الحلل زهقنى من صوتى
فعملت نايم عشان يعدى القطر
وام العيال زعقت نكشت ف أحزانى
كان خادنى حلم و شدنى للموت
والوهم كان مخلوط عسل و أغاني
واسأل "محمد سعيد"
عن اللي كان بيصلى فرض بفرض
وعن اللي نط قدامه ع المكتب
وقاله مين علمك تتكلم كما الأنبيا
يومها اتهبلت"ياحمدى ياقناوى"
وقلعت قبقاب الصعيد
عشا ن يغنى" الشيخ إمام" ف الجامعة
وعشان" سمير الأمير " يشق الغيطان و يجيلك
ويحط قلبه ف قصيده
الشعر فيها بتخنقه الشعارات0
000000000000000000
لو عشت انا ف الذاكره 00الوقت يسرقنى
ملحقش اجيب جزم العيال ف العيد
مشاركنى ليه يا وطن فى رزق نساني النشيد
سيبنى أنام يا وطن علشان يعدى القطر
و بلاش أمانه عليك
تقلقنى ف منامى" بحمدى قناوى و" محمد سعيد