انا اول ماشفت التوبيك ده كنت ف الامتحانات
قولت
انت بتقول فاضل 4 شهور وقلقان
وانا فاضلى كام ساعه وانا لسه مذاكرتش حاجه (ياسلام ع برودى)
ما علينا خلينا ف المهم
بعيد عن المثاليه والكلام ده
فالطبيعى انك تبقى قلقان
كلنا كنا بنبقى قلقلانين
ومهما نذاكر كنا نقول ان احنا مبنذاكرش
لازم يبقى عندك تقه ف نفسك ومتفضلش تقول انا مش هنفع
ياعنى انت مش معقول ماكنتش بتذاكر حاجه خالص طول الفترة اللى فاتت
والله كمان الفترة اللى جايه لو ركزت فيها هتوصل للأنت عايزه
حبه تركيز صغيرين بس
والسنه دى أخف كتير م 3 وموادها لذيذه
ياعنى لو خدت ماده ماده وفكرت هتلاقى الموضوع سهل
لو فصصناها براحه كده
العربى
لو انت مذاكرتش حاجه خالص
سيبك منه دلوقتى
مش هتسيبك خالص
سيبك م اللى فات
وابتدى مع الجديد ذاكر اللى هتاخده
مش لازم مذاكرة جامده أوى
بس تبقى عارف بيتكلم ع ايه
ياعنى ع أقصى تقدير
لما تشوف سؤال ع اللى ذاكرته تبقى عارف الحل بتاعه ابه ومكانه ايه حتى لو انت مش حافظه بس تبقى عارف ان السؤال ده حاله هيبقى كده
وسيب الحفظ لقبل الامتحان انت كده كده هتسيب 10 للعربى قبل الامتحان
انت يادوب هتحفظ صيغه الحل بس ف ال10 ايام اللى قبل الامتحان
بس بردك حاول تحفظ شويه
الادب
ده بقى لازم تحفظه م دلوقتى
هو ادب 2 أخف كتير م 3 وحفظه أسهل
بس ضمان أحفظه دلوقتى والقديم كمان أحفظه دلوقتى
خلاصه الكلام ف العربى انك متهملوش خالص وف نفس الوقت متذاكروش جامد اوى لان ع كلامك انت لسه مذاكرتش حاجات كتير فخلى الوقت ده لحاجات أهم
انا استهبلت و سيبت العربى خالص ف 3 ولا كنت بحل واجب
مش هقول مكنتش بذاكر انا اصلا لو جيت سألتنى بعد الدرس خدتى ايه ؟هقولك معرفش ووقفت درس العربى م بدرى أوى يجى م اول 5 كده
وجيه ع دماغى ف الاخر لانى قبل الامتحانت ب15 يوم تعبت اوى ومكنش ينفع اخد دروس ولا حاجه ومكنش فيا دماغ أركز أًصلا
ياعنى ف تالته دى نقصت توتال 4 درجات 3 منهم عربى بس
ال10 اللى قبل امتحان العربى مهمين جدا وممكن تذاكر المنهج مرتين ع الاقل لو انت عايز
الفرنساوى
انا مكنتش فرنساوى
بس اللى اعرفه ان الفرنساوى طويل
فحاول تخلص فيه
حد غيرى يفيدك ف الموضوع ده
الانجلش
أظن ماده بسيطه
ياعنى لو ركزت ف الدرس كويس مع شرح الجرامر
يادوب تحفظ الكلمات (و ياريت بلاش تضيع وقت كتير في حفظ الكلمات بس تحفظها بس ماتدهاش وقت أكتر م حجمها ياعنى ) و مع بصه بسيطه ع الجرامر طالما انك مركز ف الدرس هتحل ع طول ان شاء الله
القصه دى بتبقى مضمونه ان شاء الله فلازم تحفظها دلوقتى علشان الحاجه الوحيده اللى هتبقى ضامنها ف امتحان الانجلش هى القصه غير كده ممكن تلاقيه عاكك وجايبلك حاجات غريبه
والقصه كمان بتاعه 2 بيتهيقلى كانت سهله
نخش بقى ف اتقل مادتين
الرياضه والكميا
اخلى الكميا للأخر علشان دى حبيبيتى
الرياضه
مش فاكرة المنهج كان بيتكلم ع ايه
بس كان فيه جا و جتا وحاجات كده
المهم
طبعا لازم تذاكر و تتفهم و تحل فيها كويس
وهتلحق تخلصها قبل الامتحان ان شاء الله
ياعنى الرياضه ميزتها انها مش محتاجه مذاكرة يادوب حل بس
ياعنى ممكن بين كل ماده وماده ف مذاكرتك تحللك كام مسأله رياضه
و ف الاخر طبعا حل الامتحاانات هيديك ثقه كبيرة ف نفسك
بس ياريت لما تيجى تحل بلاش تيأس بسرعه وتقول مش عارف وتقلب الكتاب تشوفها م الحل ع طول
لأ فكر كأنك ف الامتحان وانت هتعرف تجيبها وان بتقول انك كويس ف الرياضه
فإن شاء الله مش هتبقى مشكله
الكميا بقى
ماده لذيذه جدا ع فكرة
واحسن ماده علميه هتاخدها ف ثانويه عامه
وكمان مش صعبه لا العكس لذيذه اوى اوى
والعضويه اللى اول ما حد يسمع انك بتاخد كميا
يقعد يخوفك منها وتسمع كلام عجيب كده
بالعكس لذيذه جدا
بس نصيحه منى ماتحطش الكلام ده ف دماغك
اناكنت راحه أول حصه عضويه وانا قانعه نفسى انها صعبه ومش هفهم حاجه وبتاع م كلام الناس
وف الدرس الكل عمال يحل وانا مش عارفه أعمل حاجه علشان انا حاطه ف دماى انها صعبه
مع انى لما روحت وذاكرتها لقيتها سهله جدا
لو لسه مابدأتهاش يبقى أبدأها حصه بحصه والله هتبقى عامله زى الرياضه حاول تستمتع بيها
الكميا الغير عضويه بقى
بردك سهله اوي
و ع ما أتذكر مش كل الفصول متراكمه ع بعضها ياعنى لو حاجه فاتتك ممكن تكمل ف الجديد م غير مشكله بس تبقى فاهم الاساسيات
وفيه الفصل بتاع المسائل ده بيتهيقلى كان ال6 سهل أوى
الكميا فهم أكتر منها حفظ
فمذاكرتها غالبا مش بتاخد وقت كبير بس انت تركز
القديم طبعا لازم تذاكره ومتسبهوش للأخر علشان مش هينفع
لازم تذاكرها وتراجعها قبل العربى
وصدقنى هتلاقى وقت تذاكر كويس وتحل وتلعب وتقعد ع النت كمان
ف ثانويه عامه
هتزهق م كتر م المدرسين بتراجع فمتقلقش لو حاجه فاتتك دلوقتى
المدرسين هيرجعولها تانى فبلاش يأس خالص لأن لسه ف وقت
عامه ياعنى ف مذاكرتك
- أول حاجه لازم تستعين بربنا وتثق فيه
وأفتكر ((( أنا عند ظن عبدي بي )))
- التركيز ف حصص الدرس هيوفر عليك وقت جامد أوى ف المذاكرة
- حاول دايما قبل ما تنام تكتب اللى انت عايز تعمله بكرة مش جدول بساعات وكده .... لا أنت أكتب الحاجات اللى أنت عايز تذاكرها
ياعنى مثلا
هذاكر فصل قصه انجليزى_ فصل كمياء وهكذا تحتت بعض كده
وتانى يوم ان شاء الله حاول ماتنمش غير لما تخلص اللى انت كتبته
خلصته بدرى ولٌعدت تلعب بعدها
قعدت تلعب ف النص
المهم انك ماتنمش غير وانت مخلصه
وده هيديك ع فكرة ثقه كبيرة ف نفسك
وهكذا كل يوم بقى
- حاول تحط دايما لنفسك حافز
ياعنى مثلا تقول لنفسك لو خلصت الناهرده بسرعه بكرة هخرج مع أصحابى (انا عارفه انكو ع طول ف الشارع ياعنى بس ماعلينا ) لو خلصت الدرس ده ف ساعه هقعد شويه ع الكومبيوتر
وبردك تحط لنفسك عقاب ياعنى مثلا تقول لو مخلصتش جدول الناهرده مش هقعد ع الكمبيوتر (عادى بردك مش هيحصل حاجه لأنك بدام ماخلصت أكيد كنت قاعد ع الكمبيوتر
)
بس المهم ياعنى تكون قدرت تفهم أنا عاوزة أوصل لأيه
- حاجه بقى هتساعدك ف تنظيم وقتك جدا
انك تظبطهاا ع الصلاة
ياعنى تقول انك مثلا هتخلص الماده دى ع أذان الظهر
م ساعه ماتصحى لحد الظهر وتقوم تصلى وتفك شويه وتبدأ ف اللى بعدها
لحد العصر أكون خلصت كذا وكذا وهكذا
بس يارب بقى ماكونش طولت (هو أكيد طولت ياعنى)
بس يارب تكون استفدت اى حاجه ولو صغيرة م اللى كتبته
وربنا معاكو كلكوا ان شاء الله
حاجه اخيرة معلش
خلى الجمل دي دايما ف دماغك واقتنع بيها
- تصرف وكأنه م المستحيل أن تفشل
- لكي تنجح لابد أن تكون رغبتك ف النجاح أكبر م خوفك م الفشل
ومش هقولك أتعب سنتين هترتاح بعد كده
علشان انا مش مقتنعه بالنظريه دى خالص
رربنا معاكو