مش الحكايه "البرادعى" شعر/ سمير الأمير
مش الحكايه "البرادعى"
ولو انه عالم كبير
الإسم مش مشكله
ولاد بلدنا كتير
لكن الحكايه ازاى
يتحقق التغيير؟
دى عايزه قومه قويه
تبدل الدساتير
وتساوى بين الناس
مفيش غنى وفقير
ولا ميراث غير شرعى
ولا كدب ولا تزوير
ولا رجال أعمال
ما عندهومش ضمير.
مش الحكاية البرادعى
ولو انه مصرى أصيل
لكن الحكايه إن مصر
بلد الهرم والنيل
تقلع تياب القهر
و العدل يبقى دليل
تلبس تياب العصر
ده العلم توبه جميل.
|