اقتباس:
المشاركة الأصلية كتبت بواسطة بإذن الله الأولي
شكرا ليكم بجد يا جماعة و من ناحية نفسي أكون الأولي علي إيه ، فأنا إن شاء الله هأكون الأولي علي الجمهورية بإذن الله و بكدا أكون الأولي علي مدرستي و محافظتي و جمهوريتي كلها و مفيش حاجة أحسن من كدا لي . بس المشكلة في الظلم في الدرجات و التصحيح مش بيكون كويس بالذات في الشهادات و المشكلة الأكبر هو مراجعة التصحيح مش بيكون غير بجمع الدرجات و لو عاوزين مراجعة الدرجات بيكون بتقديم طلب في المحكمة زي قضية يعني و الحكم فيها بيكون بعد تقريبا4أو5 شهور
يبقي كدا في عدل؟ أبدا
أنا دلوقتي في 3 إعدادي و كنت في امتحاناتي في اللجنة إللي كنت فيها قمة الغش و كمان كانوا بيقولوا مفيش إجابات بتدخل اللجنة علشان فيها الأوائل و لجنتنا أصلا كان فيها كل صور الغش و أنا قلت للمراقبين يمنعوا الغش و لا حياة لمن تنادي أبدا و قاعدين و لا كأنهم شايفين حاجة مش ترضي ربنا قدامهم و الله البنات كانوا بيراجعوا الامتحانات مع بعض و إحنا لسا في اللجنة و المراقبين كمان شايفين كل دا و ساكتين و أولياء الأمور يوميا بالمدرسةو جت النتيجة لقيت إني مظلومة قمة الظلم
أنا كنت داخلة الامتحانات أصلا واثقة بربنا و بي إني مش هقل و لا ربع درجة بس إللي حصل في الامتحانات إني في مجموعي الكلي هقل درجة و نصف درجة ،في النتيجة لقيتني قليت ست درجات و نصف درجة ،يبقي دا عدل؟و أنا كنت مراجعة إجاباتي و كتباها و عارفاها و أما بيكون عندي حاجة غلط بعرف إنها غلط
و رحت أراجع التصحيح و بردو جمعوا الدرجات و قالوا زي ما هي و والله كنت عاوزة أقدم طلب المحكمة دا بس هيتقال الحكم بعد ما نتيجة الترم الثاني تبان أصلا و بابا قال كدا كمان مع إن الموضوع سهل بس بيأخذ وقت كبير
و إللي حصل دا يدل علي إن في إهمال في التصحيح و حسبي الله و نعم الوكيل
ربنا إن شاء الله هيحاسب إللي عمل نظام مراجعة التصحيح كدا و هيعاقبه
يا إما إللي حصل لعبة زي ما حصل معي في سنة 6إبتدائي
قولوا لي لو سمحتم أعمل إيه لما الظلم بيلاحقني دائما كدا من صغري؟
و في النتيجة إللي بكون مستنياها و فرحانة إني هأكون الأولي بحقي مش حلم حلمته و بإجاباتي و ألاقي النتيجة أكبر صاعقة و في الآخر إللي يتمتعوا بمكاني ناس أنا مش بقول إن هم مش ممتازين لأ شطرين ممتازين بس ميجيبوش المركز الأول و الله و أنا أزيدهم و كمان في سنة ستة رحنا للتصحيح و المعاد كان اتقال لواحد من بلدنا يقوله لبابا و مقالش لأنه كان أصل اللعبة و الله أعلم و هو عارف إن هييجي لي درجات
أنا قولوا لي أعمل إيه و أنا الظلم معي كدا و أنا بتقطع من جوايا و بعيط كل شوية و البنات فرحانة في و بالذات إن في مشاكل بسبب إن كنت بطلع عليهم الأولي و مضايقين؟
أنا آسفة يا جماعة طولت عليكوا بس مش عارفة أعمل إيه و مبقتش أتكلم مع حد في الموضوع دا في بيتي و بتكلم مع صاحبيتي بس و كمان مش بشفها كثير و مش بنعرف نتكلم علشان الوقت
|
انا رديت عليكي من قبل بس كان المنتدي مهنج المهم علشان حكاية الامتحانات والتصحيح دي مصر كلها كده علي فكرة دي مشكلة جد خطيرة لانها هتضيع مستقبل شباب كتير مستقبلهم متعلق بنص درجة او ربع درجة والمشكلة دي لازم ان نجد لها حلا لكن
وللاسف في بلدنا دي قلما نجد انسان مهتم بالمشكلة دي
المهم مش انتي انسانة واثقة بنفسك وكويسة في المدرسة اتوكلي علي الله وقولي يارب وادعي ربنا كتير علشان يوقف في طريقك ولاد الحلال اللي يدوكي الدرجات اللي تستاهليها عن حق اما عن صديقاتك بالمدرسة فلا يهمك امرهم اكيد بيغيروا منك
واخيرا وليس اخرا انصحك الدعاء ثم الدعاء ثم الدعاء