[M.Ahmed Elsaid]

اول كلمة هقولها من غير رياء ولا نفاق ولا مجاملة .. انا بأيد الرئيس محمد حسنى مبارك


وبالراحة وبالعقل كدا هنقول ليه احنا مع مبارك ...وبعيد عن السياسة والكلام الكبير

بس الاول نتكلم عن الدكتور البرادعى .. والله انا بحترم الدكتور محمد جدا لانه من ضمن الناس اللى شرفتنا فى يوم من الايام و حصوله على جايزة نوبل للسلام او منصبه كمدير الوكالة الدولية للطاقة الذرية .. حتى لو للوكالة دى مساوئ بسبب حرب العراق او غيرها .. بس اهو الراجل مصرى وخلاص ... ولازم الناس تعرف ان الدكتور البرادعى طول عمره عايش برة مصر وعن نفسى مسمعتش انه وصل مصر وظهر على الساحة غير دلوقتى بعد موضوع الترشيح للرئاسة .. طيب هو فين من مشاكل الشعب .. فين من مطالب الشعب .. فين من معاناة الشعب .. فين من حاجات كتير .. ولا بعد ما بقى مدير سابق للوكالة دلوقتى افتكر مصر .

اكررها تانى والله مع احترامى الشديد لك يا دكتور بس كلميتن كدا لحضرتك .. انا عايز المرشح للرئاسة مننا يعنى ايه مننا .. يكون بياكل فول وطعمية وكشري، وبيشرب من القلة والزير وبيلبس جلابية ويكون اتقرص من البراغيت ويكون جاله بلهارسيا وخد التطعيم وعايش وسط المصريين .. مش كان بيسمع عن مشاكل مصر فى التليفزيون وهو قاعد برة .. مش هننتخب رئيس سميع .. لا هننتخب واحد من وسطينا .. واحد حاسس بينا ..

انا واحد من المؤيدين للدكتور البرادعى جدا لكن فى مجاله بس انه يمسك منصب محترم فى الحكومة زى وزير الطاقة ..
واعترافا بقدراته فى المجال النووى .. عايزين يبقى لينا قيمة نووية زى بقية الدول .. لان دا اللى ماشى اليومين دول ..


عن الرئيس حسنى مبارك .. يكفينى انه سياسى دولى محنك من الدرجة الاولى ... لاننا من حرب اكتوبر 73 اللى كان واحد من ابطالها واحنا مستهدفين ولولا ستر ربنا مع خبرة مبارك كنا حالنا هيبقى اصعب من حال اخواننا فى فلسطين .. ويكفينى خبرته العسكرية اللى ملهاش حدود .. يكفينى وعيه للمبادئ السياسة والدبلوماسية ..

وعاوز اقول حاجة .. يا مصريين مبارك مش هو كل الدولة .. وراه حاشية كبيرة .. الحاشية دى عبارة عن رئيس وزراء .. ووزراء .. محافظين .. رؤساء مجالس مدن .. رؤساء احياء ..


والحكومة هى ايه غير الشعب .. يبقى احنا عايزين حكومة بجد تعيش مع الشعب


انا مع الرئيس حسنى مبارك الى ان يتوفاه الله .. اطال الله لنا فى عمره .. يارب

مصر هى مبارك مع حكومة قريبة من الناس