أنا روميو وانتى ع السطوح جولييت
أنا روميو وانتى ع السطوح جولييت
شعر/ سمير الأمير
غطينى ياللى ببصتى مكشوفه
ودارينى منى ..منى ليه مكسوفه؟
من بدرى شايف عينك المطروفه
و كل حواديتك بقت معروفه
وكل حواديت البنات حواديت
**
أنا جيت بغنى ف الخريف عشمان
ألاقى قلبك ف الهوا إنسان
خايف ليطلع من حجر صوان
ويسبنى ف ليل الشتا بردان
واقول يارتنى عمرى ما حبيت
**
عارفك شقيه والخبر جالى
فبلاش ملاوعه وارأفى بحالى
وحسى بيا ده الحبيب غالى
عاشق متيم وانت ف العالى
أنا روميو وانتى ع السطوح جولييت
|