عرفت عينيه الدموع يا منيتى بعدك
والسر بين الضلوع أشكيه لمين بعدك
صبحت مثل الشموع لما الزمان بعدك
حاولت أنسى همومى والعذاب أخفيه
وغصب عنى بيجى الشوق يغلبنى
بيضيع منى نصيبى والأمل أخفيه
وصبح عزولى بكلام اللوم يغلبنى
سهم المحبه جرحنى والألم أخفيه
وان جيت أنسى ألاقى الحنين يغلبنى
يا عز لاحباب أنا قلبى هوى قلبك
أعيش فى عز وسعاده لو رضى قلبك
قلبى إليك انفتح بقى قلبك
والجنه فى قربك والجحيم بعدك
..........................................
موال الفقير
ما يعرف الحزن إلا اللي حزن وحده
دا مهده ولا سريره ولا دا لحده
لا شاكره ينصفه ولا يرحمه جاحده
فقير وما يمتلك غير نفس لوامة
أرضه غيطان التيه وبحوره دوامة
ياما بيحلم وحلمه بيجرحه ياما
واصحابه ياما وعايش وسطهم وحده
.......................................
يا عينى من صبرك ومن نوحك شكوا البلدين
وإستعملوا الصبر ياك الخلاص بالإيدين
عاصى يا ناس ولابس من الشقا توبى
والنفس متمردة كل ما أقولها توبى
أنا عايزك ياربى توفقنى وأغسل من الذنوب توبى
وتغفر زنوبى وأجيلك يا كريم بلا دين
.................................................. .........
أة م العيون اللى مداريها الحجاب لاسمر
حجب الجمال حسنها مع رمشها لاسمر
والزرع بيؤل علشان الجميل لاسمر
الحب خلا البلابل غردو تغريد
مع لحن الهوى للى انكوى تغريد
انا قلبى مال للنغم اصل الغنا تغريد
مكرهتش البيض لاكن قلبى هوى لاســــــــــــمر
.................................................. .......................
مليني يا زمان علي اللي يكتبو قلمي
انت اساس التعب وانت سبب قلمي
جرح الاحبه استوي ومفيش دوي قلمي
لحد فين يا زمان العند وياي
ليه خليت الجار وجار الجار يلوموني
ومن ظروفهم لسانهم طال وياي
يصحو من النوم بطول اليوم يلوموني
مفيش زميلي خلاف الفكر وياي
وغير كده القرب قبل الغرب يلوموني
يا وقت عايب طفيت الورد وشموعي
لك سهم صايب علي الايام وشموعي
فضلت اسطر فعال الايام وشموعي
حبري دموعي وصبري بعملو قلمي
يا مربياني يا امي ولسه بتربي
في ولادي وولاد ولادي كتير بتربي
يا معلماني النصيحة وبرده بتربي
يا قلب مليان ايمان لكي في الايمان ايه
يا بحر مليان حنان لكي في الحنان ايه
وحياة كلام ربنا ايه ورا ايه
ادعيلي اخدك معايا تحجي بيت ربي
.................................................. ......
اصل الحكايه انا غاوي حمام زغليل عجبني طير حلو ونقيته من الزغليل
وعملت احسن بناني تعجب الزغليل
وبنيت له غيه فوق الغيه وانا رايق وقلت يبقي وليف لي وانا رايق
حبيته لما انشغل بي وانا رايق معلمش ان العتايق يفسدو الزغليل
.................................................. .........
نقيته ذغلول صغير كان صغير بيدي
اسقيه بحنكي المويه واكله بايدي
واخاف عليه من الهوي والشرد ما بيدي
طلعت اشوف البناني لقيت حمامي طار
شوف لما ريشه طول ساب البناني وطار
صعب علي من الفرقه وعقلي طار
وقعدت محطار ولكن غصب ما بيدى
.................................................. ........................