[أ/رضا عطيه]

أبوحمالات عمال يقول ويرمى اتهامات
يشكك فى كل شىء ويبعت لهم رسالات
ياعالم إلحقوا التزوير مالى الانتخابات
والدنيا هيطربقها علينا


صحفى وواكلها والعه واحنا فى نظره مجرد سلعه
يصعد على اكتاف الغلابه وناوى يطلع هى الطلعه
عامل وطنى وهدفه وطنى وشغال يسىء للسمعه
وسايبينه يغنى علينا


قاعد تحت التكييف ويقول كلام تزييف وللفتن تقول حريف
ولو نفكر فيها هنعرف إنها هلوسه وكلام عبيط وتخاريف
بيستخف دمه ياحفيظ وبيحاول برخامته يعمل عليناظريف
وقال إيه بياخد بإيدينا



ولو صادق فى كلامه يقول لنا بياخد كام فى الحلقه
وتعالى نحسبها كدا سوى ياحلوين بالقلم والورقه
ونشوف هيفتح كام بيت أومرتب شاب أوحتى صدقه
م الغلب والجوع تحمينا


الفاسد بيحاسب الفاسد والشعب فى النص ياولداه قاعد
مستنى ونفسه يعرف هترسى على إيه
واحنا نميل هنا شويه ونطبل --ونميل هنا شويه ونهلل
ولاداريين باللى بيحصل وهيجرى لنا إيه
وعلى حسب الريح مايودينا


الكل بيضحك على كله والكل بيخطف ملايين وراها ملايين
والطوابير للغلابه والمر قراءه وكتابه ودموع محبوسين
هيما عمال يبدع وريما قصرها اتصدع وهنروح بس لمين
أقول لكم - هقوم أنام وكفايه كدا وإن الله يحب المحسنين