محتاج لحضنك
بحبك ومحتاج لحضنك ضميني ودفيني
بحبك محتاج حنانك وقسوتك بترميني
بحبك ومش عارف أنسى ليه بتنسيني؟
بحبك والله بحبك وأنتى بس فينك وفيني
عايش فى حضنك غريب و فين حضن الأم؟
ضاع قدامك حقى بين الدول وولاد العم
ولادك يا أمى اتشردوا وبيمصوا مننا الدم
دموعنا نشفت ياأمي وكتر علينا الهم
زمان الوبا أخد هنادى يا مة فى دعاء الكروان
دلوقت الغلا بياخدنا يامة والنوم علينا سلطان
خيرك مابقاش لينا ياغالية سرقوه ولاد الجان
وحتى لقمتك يامة بقت كيميا وكمان سرطان
ابنك يا محروسة بين الأمم عايش كسير
ابنك يا أم الدول جريح وقتيل يا إما أسير
ابنك يا أم الدنيا ظهره اتكسر وعايش فقير
ابنك يا أم البشر بيصرخ ومش لاقى مجير
اصحى يا أمى ونادى ولادك حيرجعوا مسرعين
حيسمعوا كلامك يا أغلى أم ووطن وأغلى طين
بس اصحى يامة من نومتك يا قاهرة الصليبيين
فكريهم يامة بأحمس ومينا و أيام صلاح الدين
بحبك ومحتاج لحضنك ضميني ودفيني
بحبك محتاج حنانك وقسوتك بترميني
بحبك ومش عارف أنسى ليه بتنسيني؟
بحبك والله بحبك وأنتى بس فينك وفيني
|