<div align="center">المكان:كهف207 الدور التاني تاني بلكونه شمال
الزمان:حاجه بتاعه خماشر تمناشر الف سنه ايام الكهوف
يدور الحوار كالتالي
ههووو جوشا مبومبا خووووووووووووووت
شكننبها ثبلعصثبل ثصكصني
و ده ترجمته
هو:انا قولت مفيش شغل يعني مافيش شغل
هي:و انا قولت هشتغل يعني هشتغل انا لازم اثبت وجودي
ما اكيد مش هتفهموا لغه زمان انا بس اللي اعرفها
تعليم بقي اصلي متعلم بره (عالسلم)ما علينا
و تدور عجله الزمن
المكان:مديريه امن الاسكندريه قسم البلاغات
الزمان:عام2007 الساعه12.30الظهر
هو:كده تخبطيني بالزهريه علي دماغي يا بنت ال....كان يوم اسود يوم ما اتجوزتك..و كل ده عشان الشغل
هي:الله يخرب بيت الجواز عاللي بيتجوزوا مانا كنت في بيت ابويا زي الفل
و طبعا هتسالوا انا عرفت الكلام ده منين
لا انا مش ظابط انا مهندس بس كنت ممسوك في لجنه بس مش رخص وبلاش احراج
المهم ممكن تتخيلوا اني كنت واقف انا و الشاويش جنبي وانا اساله هو في ايه
و هو يقولي مالكش فيه
و بعدها شتيمه بينهم و اساله هو في ايه؟؟؟
يقول مالكش فيه
طبعا بعدها بربع ساعه كنت بعزم عالشاويش بسجاره و قعدنا مع بعض و حكالي الحكايه كلها و خلصنا الموضوع معاهم
الموضوع كان ان خناقه ما بينهم
عشان عاوزها تقعد في البيت و هي عاوزه تشتغل وصلت للتراشق بالايدي و الاسلحه البيضاء قنابل المولوتوف
و في قوات حفظ سلام بتخلص هناك و انا بكلمكوا دلوقتي
المهم المشكله دلوقتي اللي بقت بتهدد كل بيت
سواء جديد او بيت قديم
ان الست عاوزه تشتغل و الراجل مش موافق لانه عاوز حد ياخد باله من البيت
و الست شايفه ان الله يرحمها سعاد يونس كان عندها حق اما قالت...هو انا الجاريه اللي امك اشتريتهالك
و فعلا الموضوع ده بيصل لحد الانفصال
و بيبقي ضحيته الابناء
و السؤال هنا للاولاد
اما تتجوز...هتسيب مراتك تشتغل؟؟؟؟ ولا لأ؟؟؟؟؟؟؟
و بالنسبه للبنات
اما تتجوزي..هتشتغلي ولا هتقعدي في البيت؟؟؟و لو جوزك اصر علي انك تقعدي هتعملي ايه؟؟؟؟؟؟؟؟؟؟؟؟؟؟؟؟؟
انا بالنسبه ليا
انا هتجوز و اقعد في البيت هي الواحده مننا ليها ايه غير بيت جوزها؟؟؟
ايه التخريف اللي انا بقوله ده؟؟؟ لامؤاخذه ده كان الفيلم العربي
انا هقولوكوا رايي اما الاقي ردود في الموضوع و امانه عليكو تردوا عليا
و محدش يسالني انا كنت ممسوك في المديريه بعمل ايه
يالا سلام يا شباب</div>
|