[هيثم عبدربه]

أنا شفت يابنى معاك الذل
وجعت واتعريت وشقيت
لاجل ان اشوفك سيد الكل
وشمعة نايرة تقيد البيت
..........................
أغلى المدارس دخلتك
كتب ..ملابس.. من عينى
دروس خصوصى وطاوعتك
وقلت على راسى وعينى
..........................
وتمللى كنت اعمل دادة
الناس تنام الا انا صاحى
وان قلت اه تبقى ولادة
وتسمع الدنيا نواحى
.........................
والكورة بطلت اسمعها
لاجل ان اخلى البيت هادى
والنشرة ع القهوة اسمعها
وأقول عشان الواد : عادى
.........................
وادينى قاعد مستنظر
اسمع يقولوا انك ناجح
وسط البشر امشى اتمنظر
وأقول فلحت.الواد فالح
..........................
إياك ياواد تكسر ضهرى
وروحى تقتلها بإيدك
يارب سلمتك أمرى
استرها ويانا عبيدك
.......................
قلم /هيثم عبدربه السيد
كتبت القصيدة عام 2007