[أ/رضا عطيه]

هبدأ وأمرى لله
أتذكر جيدا مدرس الرياضات وأنا من صغرى وبينى وبين الرياضيات علاقة مش ولابد
لكن كان هذا المدرس قمه فى مادته رحمة الله عليه
فى يوم كتب لى مسأله على السبوره وطلب منى أحلهاوكانت طرح
حاولت معاها شمال يمين مفيش فايده وكنت منتظر العقاب بفرع شجره ولارجل كرسى ولاحاجه
لكن عمل معايا حاجه تأثيرها معايا لحد الان
بعتنى للعامل وقال لى إسأله على حلها وفعلا حلها العامل صح
فماكان من هذا المعلم القدير إلا وطلب من التلاميذ يصفقوا لى ولعم مصطفى (العامل)
ودارت الأيام واصبحت زميلا له فى نفس المدرسه وكان ناظر لها ولكنى كنت مدرس دراسات
وفى يوم سألت التلاميذ عن المحاصيل الصيفيه والشتويه فى مصر
فلقيت نص الفصل مش عارف
فعملت إيه ؟فقررت أخدهم للجمعية الزراعيه ورحت اٍستأذن من الناظر لقيته ضحك وقاللى بس أنا بعتك للعامل مش للجمعيه الزراعيه - يعنى هو كمان فاكر ودا اللى خلانا ضحكنا بطريقة غريبه
أخدت الفصل كله للجمعيه الزراعيه وكانت ملاصقه للمدرسه وكل تلميذ ومعاه كراسته وسألوا فى كل درس البيئه الزراعيه
وزى ما أنا فاكر اللى حصل معايا -- الفصل كله فاكر اللى حصل معاهم--والأجمل لما تلاقى المدرس هو كمان فاكر
قصه بلدى بتحاول وزارة التربيه والتعليم تنفيذها الأيام دى وربط الطالب بالبيئه اللى عايش فيها
شكرا للجميع