شفت كتير أشكال أجناس
شفت وشوش
شفت رتوش
شفت الناس من بين الناس
*******
ناس شقيانه
وناس تعبانه
وناس تتعب لو مضغوا لبانة
وناس ظهرها منحني من الفاس
*******
ناس من كتر الغلا مكبوتة
مش قادرين يشترو كيلو قوطه
وناس مبسوطة
عايشه حياتها في شرب الكاس
*******
ناس فقرا ومش قادرة تعيش
أكتر كلمة تقولها مفيش
وفي ناس تاخد ما بتديش
وعشان تدي إيديها تتباس
*******
ناس كرامتها فوق الكل
رغم الفقر ما ترضاش بالذل
وفي ناس واطية زي الفل
تِوْصَل لو حتى هتنداس
*******
ناس دايماً واقفين طوابير
لقمة عيشها ده هم كبير
وفي ناس رغم إنها طنابير
عمرها ما تتعب ولا تحتاس
*******
ناس تديها ظهرك تإذيك
وناس تتمنى إنها ترضيك
عايشة حياتها كلها ليك
بتكمل معنى الإخلاص
*******
ناس عايشة في زحمة ودخان
شمس وحر وخنقة كمان
وفي ناس تانية قليل ما تبان
وبتتشال كده فوق الراس
*******
ناس تلاقيها ساعة الجد
عمرها ما تتعب ولا تتهد
وفي ناس عمر هاما ساعدت حد
نفسي وبس – أنا وخلاص
*******
ناس بالرغم إنها محتاسه
ما بتطلبش عشان حساسه
وناس تندب في عينها رصاصه
ناس ***** منها الإحساس
*******
لكن بين الناس والناس
شفت وشوش
شفت رتوش
شفت الناس كده غير الناس
*******