البنات لما تشتري هدوم
ـــــــــــــــــــــــــــــــــــ
من قريب اوي يعني يومين تلاته كده اضطرتني الظروف اني اخرج مع اختي عشان هتشتري هدوم
وطبعا دلوقتي صعب اوي ان حد يخرج بالنهار عشان الصيام فالخروج بيبقي بعد التراويح ..وعلي ما البنات تلبس وتجهز نفسها والحوارات التعبانه دي يبقي الساعه 11 ...فلازم حد يخرج معاهم ...وبما اني الولد الوحيد ...يبقي اكيد اتدبست
خرجنا عادي جدا ..والطبيعي عند الولاد انك بتبقي عارف محل معين او اماكن معينه بتجيب حاجات حلوه وبتشتري منها
الكلام ده يختلف عند البنات ...لازم يلفوا علي المحلات كلها ..افرض مثلا المحل ده جاب حاجه حلوه !!
والمشكله انهم عارفين ان دي محلات تعبانه...تقولك ممكن تحصل المعجزه ويكونوا جابوا حاجات حلوه ...لازم نشوف كل حاجه ..ماشي شوفي اللي انت عايزاه ..احنا ورانا حاجه ؟؟!! واللي يضايق اكتر ان كل الناس بتشتري في وقت واحد ...زحمه بطريقه رهيبه
والبنات بردو عندهم عاده غريبه يعني ممكن واحده تدخل تقلب المحل وتبهدل الراجل اللي بيبيع وفي الاخر تقول بكل برود (مش عاجباني حاجه ..يلااااا نمشي ) انا مش عارف بيبقي ايه شعور الراجل بس اكيد بيبقي عايز يقول زي احمد مكي *** هههههههه
وممكن بردو تبقي الحاجه حلوه وعاجباهم وتلاقي واحده تقول للراجل فيه منه الوان ؟؟
تخيل انت نفس التيشرت فيه منه الاحمر والاخضر والاصفر والاسود هههههههه
عن نفسي الحاجه اللي تعجبني ..يبقي نازل منها حاجه واحده بس ..موديل واحد بس ...مش سوق هو.. التيشرت يبقي نازل ب عشر الوان
وانت ماشي بقي سامع الكومنتات من البنات
الله يا مامي ..ايه رأيك في المش عارف ايه ده
(عندهم حاجات غريبه ..بلارينا و مممم والله ما فاكر بس اسماء غريبه كده ) ده هيبقي تووووحفه (تحفه يعني )
اه هو حلو بس لو فيه منه الاحمر
يا مامي بقي ..ده كميل خالص
ماشي يلاااا نشوفه
وانا ماشي بردو شفت بنتين صحاب بيشتروا مع بعض
واحده بتقول التانيه ..ايه رأيك في ده ؟؟؟
قالتلها .....هو حلو بس هيبقي بيئه اوي عليكي ...ده هيبقي حلو عليا انا او علي مريم (مين مريم ؟؟ الله اعلم
)
كلمتها تاني وبتقولها طب ايه رأيك في ده ؟؟
قالتلها ....هو حلو بس انا عندي واحد زيه بالظبط ...هيقولوا انك بتقلديني
(يعني هو الاستايل معمول ليكي انتي )
وانا واقف سامع الحوار وهمووووووت علي نفسي من الضحك ..ايه التفاهه دي ؟؟!!
حوار تاني ..واحده بتقول للتانيه ..انا مش عاجبني حاجه ..بس هاخد اي حاجه واعمل ان انا بقيسها وهظبط الميك اب في المرايه
(قال يعني البت هتتخطب دلوقتي
)
التانيه بترد عليها بطريقه استفزتني اوي
بتقولها ...تيك كير يا حبي !!!
و يا سلام بقي لو واحده جاي معاها خطيبها او اخوها ..وعايز يعمل فيها راجل
بيدي رأيه في كل حاجه ..لأ ده هيبقي ضيق اوي وهو عادي خالص ...لأ ده شكله مش عاجبني (يا عم هو انت بتفهم في هدوم البنات ..انت مالك انت ؟؟
)
عايز يرسم وخلاص ويعمل فيها مسيطر ومتحكم
الحته دي فكرتني بنكته في فيلم نور عيني (واحد شاب كده وسط صحابه وعامل نفسه جامد اتصل بمراته بيقولها ايوه يا وليه حضري الميه السخنه ...واحد من اللي قاعدين معاه بيقوله واضح يا معلم انك مسيطر ...قاله الله ..امال هغسل المواعين بميه ساقعه ؟؟!!
)
وبجد انا اول مره اصدع كده وانا خارج اشتري هدوم ...تخيل نفسك واقف في مكان فيه محلات كتير وبنات كتير واكيد كلهم رغايين ..لو كل واحده قالت كلمه ..سوف هيحصلك ايه ؟؟؟!!!!
نصيحتي ليكو ...هاند فريهك (hand free ) معاك ..موبايلك في جيبك ..وعيش مع نفسك يا معلم
و صح ..متنساش تشرب بريل ...طعم يغطي علي المر اللي بندوقوا
يتبع ...