السلام عليكم و رحمة الله و بركاته ،
فيوم عادي من حياتي العادية و في ساعة عادية من نهاري العادي ،
سمعت صوت ،، صوت ايه دي اصوات !!
المهم خرجت اشوف فيه ايه ،
بصيت شمال لقيت خناقات بصيت يمين لقيت طوابير !!
هزيت راسي لانه مشهد عادي فبلدي العادية !!
دخلت فتحت التلفزيون لقيت اعتصامات و مظاهرات ،،
شباب و موظفين و عمّال ..... الخ ,
بس ما تعبتش نفسي اشوف عن ايه لانها منظر عادي فبلدي العادية !!
قلبت القناة لقيت جدو راح و جدو جه و جدو خد و جدو عطى
فقلت ايه ده هو كل يوم جدو جدو !! مافيش يوم تيتا ؟! 
بس بردو ما متستغربتش لانه حاجة عادية فبلدي العادية !!
فقفلت التلفزيون ،
وفكرت
هي مصر محتاجة ايه عشان تكون بلد مش عادية ،
بلد صالحة للحياة فيها يعني ،،
فقلت يمكن محتاجة ريس ؟!
ولا حكومة ؟!
ولا يمكن شعب ( ده على اساس انه 80 مليون و شوية قليلين ) 
ولا فلوس ،، ماهو العالم كله ماشي بفلوس اليومين دول ، مش كدة ولا ايه ؟!
و لاهي محتاجة شوية امانة على شوية صدق على شوية مصداقية و شفافية
من كل حاجة شوية كدة و الطبخة تطلع مية مية ،
بس فالاخر طردت الافكار ديه كلها من دماغي
و عرفت هي مصر عاوزة ايه
مصر عاوزة الحب
فعشان كدة غنيت
يا حبيبتي يا مصر .......... يا مصر
يا ترى انتو شايفين هي محتاجة ايه ؟!