السلام عليكم
انا من حاسبات عين شمس فهحاول اكلمك عنها كدة على السريع اولا هية الكلية مش صعبة اوي يعني بس هية محتاجة شوية مذاكرة وشوية حضور المحاضرات وسكاشن
بس ده لو عاوزة تعدي وخلاص لكن لو عاوزة تشتغلي في مكان محترم جدا بعد ما تتخرجي فاكيد لازم تتعبي وده قاعدة تقريبا في كل الكليات
كليتنا بيقولوا انا احسن كلية وانها اكتر واحدة بتطبق معايير الجودة ومش عارفة ايه بس ما علينا يعني ,,
اغلب الدكاترة والمعيدين وحتى الطلبة عندنا محترمين جدا وبيحبوا يسعدوا اوي
عندنا الدرسة بتبقى كل ترم في 6 مواد وبيبقى في امتحان ميد تيرم وده في نص الترم وامتحان الفاينل (اخر الترم)
في سنة اولى وتانية بتبقى تقريبا اغلب المواد مواد ملهاش علاقة بالكمبيوتر بس بنحتجها اكيد بعد كدة زي الفزيا والرياضة والاحصاء والانجليزي وغيرهم
المواد اللي بيبقى ليها علاقة بالكمبيوتر بيبقى ليها غالبا مشروع كل جروب بيسلمه في امتحانات العملي
كل المواد بالانجليزي وده ان شاء الله مش بيبقى مشكلة وتقريبا بعد الاسبوع التالت الناس كلها بتبقى اتعودت
بالنسبة للاقسام متشغليش بالك فيها اوي لان اغلب الكليات بيبقى التخصص في تالتة واحنا عندنا في رابعة بس احنا عندنا قسم
جديد اسمه الbioinformatic وهوة بفلوس وبيبقى من سنة اولى وهمة بيدرسوا فيها بجانب الدراسة بتعتنا العادية احياء بس طبعا مطلوبين جدا بعد كدة في الشغل
وعموما هوة كل الاقسام يقدروا يشتغلعوا نفس الشغل بس كل قسم بيبقى عارف في حاجة معينة زيادة
بالنسبة للوظيفة ان شاء الله مفيش مشاكل خالص لان احنا مطلوبين جدا في سوق العمل وفي ناس بتشتغل وهية لسة متخرجتش واعرف ناس سافروا برا بس الناس الجامدين اوي مش اي حد
وعامتا انت متقلقيش خالص انا عارفة حالة التوهان دي
بتبقى موجودة في كل طلبة سنة اولى مش انت بس وان شاء الله اول ماتدخلي الكلية هتلاقي حد يفهمك الامور اكتر
نصيحة مني سواء دخلتي عين شمس او غيرها متستنيش تخدي معلومة من الكلية عشان تذاكريها مهما حصل الكلية مش هتديك كل حاجة هية بس هتفتحلك ابواب وانت لازم تكملي مع نفسك ابداي برمجة قبل ما الكلية تبتدي هتفرق معاكي اوي و عودي نفسك على القراءة وكتب بالانجليزي مش بالعربي عشان متلخطيش نفسك
سنة اولى الترم الاول مهما حد فهمك وعرفك النظام ماشي ازاي هتبقى صعبة عليكي لانه تغير كبير عن دراسة المدرسة فشدي حيلك جامد اويييييييييي الترم ده لانك هتتعبي اكتر من اي ترم وان شاء الله بعد كدة الترمات حتعدي اسهل بكتير رغم انك هتخدي حلجلت اصعب بكتير
معلش طولت عليكي لو عندك اي استفسار ان شاء الله احاول اساعدك