السلام عليكم ورحمه الله وبركاته
اليوم ان شاء الله نتناول ماده الهستولوجي ونبدا سريعا على بركه الله
ونقول بسم الله الرحمن الرحيم
Histology
وهو علم دراسه الانسجه
اولا سنلقي نظره عامه على الماده ومن ثم نتناول اول محاضره في هذه الماده ان شاء الله
الادوات المستخدمه في هذه الماده
- قلمين هستولوجي ألوان ازرق و احمر من المكاتب اللي جوة الكلية ورا التندة بالاضافة لالوان تانية بردو فهتحتاج علبة ألوان عادية كمان
- كراسة عملي من القسم او كراسة صماء من اي مكتبة
- أطلس ملون مثلا اطلس د. م حسان اللي لونة ازرق أو أطلس د. ألفت
الكتب
هنذاكر منين؟؟
- كتاب د.محمد عصام حلو جدا فيه كل حاجة بس طويل شوية بس لو بدات فيه من اول السنة هيظبط ممكن توقعت شوية معلومات صغيرين وانت بتزاكر عادي
- كتاب د. ماهر عمارة كويس بس مختصر قوي لازم تحفظ كل كلمة في الكتاب متنقصش حاجة غالبا اللي بياخدوا مع د.ماهر بيزود لهم حاجات على الكتاب
الاحسن انك تذاكر جمبة كتاب ال essay و ال MCQ بتوع د.عصام
- كتاب د.عادل زهدي هو كبير برضو بس ميزتة انه بيعمل مخططات و بيمشي على سكيمة ثابتة في وصف الحاجات فبتبقى أسهل
- كتاب د. إبتهاج هو تجميع لل notes اللي هي المحاضرات بتاعتهااللي كانت بتنزلها سنة مكانت رئيسة القسم
عامة شوف الكتب مع صحابك او في المكاتب اللي بتبيعهم ..
المشكلة ان كل كتاب فيه حاجات زيادة وحاجات ناقصة .. فحاول تشوف العناوين مع صحابك كل فترة و لو في حاجة ناقصة عندك صورها
بس برضو الاختلافات بتكون في حدود حاجات بسيطة مش خطيرة قوي يعني
اختار الكتاب اللى هترتاح معاه حسب طريقه مزاكرتك انت يعنى مفيش فيهم كتاب كويس و كتاب وحش
العملي
المجموعة هتتقسم نصفين على معملين
في المعمل هتتعرض صور انسجة وخلايا تحت المكروسكوب الطالب هيتعلم ازاي يتعرف عليها
و المعيدين هيشرحوا كل رسمة وازاي تترسم وهيرسموها على السبورة و هيقولوا لكوا ازاي تميزوها تحت الميكروسكوب
بعدين هتلفوا تتفرجواعلى الشرايح تحت الميكروسكوبات
حضور السكشن مهم هيريحك قبل امتحان العملي
الطالب بيبقى معاه كراسة عملي بيرسم فيها العملي واطلس يشوف منه الرسومات وبعدين الدكتور في المعمل بيصححها
في كراسة القسم بينزلها و ممكن تشتري كراسة د.عصام و ممكن تجيب كراسة بيضاء من أي مكتبة بيسموها "كراسة صماء"
اهتم برسم الشرايح اللى بتاخدها أول بأول عشان ميتراكمش عليك فى آخر السنة
في الرسم الشرايح اللي لها special stain بترسمها بالوان عادية زي البني والبرتقالي و الازرق علشان درجات تصحيح الكشكول بس الرسومات دي مبتجيش في الامتحان اللي بيجي رسومات ال H&E بس
كل فترة بيلموا كراسات العملى ويصححوها وبيبقى عليها درجات خليك دايما جاهز و ارسم كل رسمه اول بأول لان لما بيتراكموا عليك هيبقوا تقال اوى
امتحان العملي بكون قدامك عدد معين من الشرايح بتقف عند كل شريحة دقيقة بعدين تتنقل على اللي جمبك
المفروض تعرف اسم الشريحة ايه و اسم الصبغة لو كانت special stain
بلاش تبوظ ظبط الميكروسكوب علشان حرام تعطل زميلك اللي هيقف عليها بعدك
عملى الهستولوجى سهل جدااااااااااااو هتحبوه اوى
المذاكرة
الهيستولوجي مادة شبيهة بالاناتومي من حيث انها بتعتمد على الحفظ والرسومات في تثبيت الحفظ
باختصار انت ممكن تخلى الهستولوجى ماده خفيفه و بسيطه جدا عليك و تجيب فيها امتياز لو زاكرتها اول لأول خصوصا انها ماده بتتنسى بسرعه جدا لكن لو اهملتها هتحس انها تقيله عليك اوى فى المزاكره اخر السنه و هتحس انك مش عارف تحفظ حاجه و لا تزاكر حاجه
بس عموما الهستولوجى تقديراتها بتبقى كويسه دايما
توزيع الدرجات
- 75 درجة امتحان التحرير اخر السنة
- 35 درجة عملى
- 15 درجة أعمال نص السنة
- 10 درجات شفوي
- 10 درجات 2quizes في السكاشن
- 5 درجات حضور السكشن
- الامتياز من 127.5
- جيد جدا من 112.5
- جيد من 97.5
- مقبول90
- النجاح أكتر من 90
محاضرة مقدمة الهستولوجي
هنكلم مع بعض يا جماعة في المحاضرة اللي خدوها الطلبة اللي حضروا مجموعة الشرح
أول حاجة الهستو دي اقل مادة هتذاكرها طووووول السنة .. مع انها لازم تتذاكر باستمرار لان طبيعة المادة انها بتتنسي بسرعة جدا
وكمان مفيهاش فهم خالص .. فا ياريت يا جماعة بلاش تهملوها طول السنة وتقولوا هتذاكروها اخر السنة ..
احنا عملنا كده وازنقنا زنقة سودة ..
بس احنا ما سيبناهاش بمزاجنا .. احنا اتشغلنا بالمواد الكبيرة زي الفسيولوجي والاناتومي واجلنا الهستو في المذاكرة .. ودي كانت
غلطة كبيرة
الهستو بشكل عام مادة بسيطة ممكن تحصل منها درجات كتيره أوي بس لازم نتعامل معاها صح ..
هنبدأ مع بعض مقدمة بسيطة أوي .. هنتكلم عن تاني شابتر في المنهج وهو شابتر ال cell واللي في الكليات التانية بيسموه ال cytology ..
احنا عارفين من ثانوي ان فيه نوعين من الخلايا .. حيوانية ونباتية
الخلية النباتية مش موضوعنا خااااالص في كليتنا دي ... يبقى كل كلامنها هيبقى عن الخلية الحيوانية ..
كنا قلنا قبل كده ان
system -----> organs -----> tissues -----> cells
الخلايا وانواعها ومكوناتها
في الشابتر ده هنتكلم عن السلز
ال cells يتختلف في شكلها حسب اختلاف الوظيفة واختلاف النسيج اللي هي فيه يعني ال cells اللي في epithelial tissue (النسيج الطلائي) غير ال cells اللي في ال connective tissue (النسيج الضام) ...
بس احنا في الشابتر ده هنتكلم على التركيب العام لكل الخلايا على اختلاف انواعها واشكالها .. وهنتكلم على المكونات اللي موجودة جوا السل .. عن تركيبها ووظيفتها
هنبدأ نتكلم عن ال cell ...
بتتكون من ايه ال cell .. ؟؟
لو جينا نقسم مكونات السل هنلاقيها بتحتوي على :
1- (Cell membrane (plasma membrane .. وده يعتبر السور اللي بيحوط مكونات الخلية ويحميها من البيئة المحيطة بالخلية .. وكمان بيحافظ على ثبات تركيز الايونات جوا الخلية وبراها وهنشوف ازاي كمان شوية
2- Nucleus .. ودي هي زي بالظبط غرفة العمليات للخلية بتتحكم في نشاط الخلية وتراقب العمليات الحيوية اللي بتحصل جواها
3- Cytoplasm & its components .. السيتوبلازم ومكوناته بالمناسبة .. ممكن نسمي السيتوبلازم اسم تاني هو cytosole السيتوسول .. كان الاسم ده موجود في الاحياء في فصل التنفس لو فاكرين
طب ال cytoplasm وفهمناه .. طب ايه ال components of cytoplasm .. ؟؟
هنقسم ال components دي الي حاجتين :
1- Organils .. دي تضغير organ اللي معناها عضو .. يبقى اسمها عضيات
2- Inclusions .. يعني النواتج اللي بتفرزها ال organils في الخلية زي الجلايكوجين glycogen وصبغات وغيرها هتاخدوها بالتفصيل بعد كده
عايزين بقى نتكلم عن ال cell membrane بالتفصيل اكتر شوية ..
بس قبل اي حاجة .. اي حاجة هتدرسها في الهستو لازم تعرف عنها خمس نقط ..
- تعريفها Definition
- وصفها تحت الميكرسكوب الضوئي (By LM (light microscope
- وصفها بالميكرسكوب الالكتروني (By EM (Electron microscope
- نوع الصبغة stain
- الوظيفة function
الغشاء البلازمي
يلا بقى نتكلم بقى عن ال cell membrane ..
تعريفه
اول حاجة ال definition ..
it is the outer most part of the cell that surrounds the cell and its components يعني الجزء الخارجي من الخلية اللي بيحيط بيها وبمكوناتها
وصفه بالمجهر الضوئي
تاني حاجة وصفه بال LM
ال cell membrane لا يرى بال light microscope واللي بيتشاف هو بس حاجة اسمها ال cell coat وده بيحيط السل ممبرين من بره .. ولما تدرسوا ال Cell coat في الهستو والبيو هتعدرفوا بعدبن انه عباره عن glycoproteins هي مس يتترجم حرفي بس ممكن نقول عليها سكريات بروتينية .. و glycolipids يعني سكريات دهنية
انسوا انسوا بلاش الكلام ده دلوقتي
وصفه بالمجهر الالكتروني
تالت حاجة .. وصفة بال EM
لما نيجي نوصف السل ممبرين تحت ال electron misroscope هنقول عليه tri-laminar
طب يعني ايه البتاعة دي .. ؟؟
tri = ثلاثي ... laminar = طبقي
يعني ثلاثي الطبقات .. طب ليه سميناه كده ؟؟ .. عشان بيظهر كده ..
طب هنيجي بقة نفصل ونقول هو بيتكون من ايه عشان يبان تحت الميكرسكوب تلت طبقات .. اتنين غامقين وبينهم واحدة فاتحة ..
ال cell membrane بيتكون من مكونين اساسيين :
اول حاجة lipid molecules .. يعني جزيئات دهنية ..
الجزئ الواحد بيبقى شكله كده
ويترص منه كتير جنب بعض وتحت بعض عشان يدونا الشكل ده
هنلاقي الجزئ الواحد بيتكون من
- Head .. رأس بيتجه الي الخارج وبيكون محب للماء hydro-philic ..
طبعا احنا عارفين ان فيه ميه جوه وبره الخليه .. عشان كده الجزء ده من الجزئ بيتجه الى الماء سواء الى جوه أو بره الخليه
- Tail .. ذيل بيتجه الي داخل السل ممبرين عشان هو كاره للماء hydro-phobic
تاني حاجة مكونة لل cell membrane ..
البروتين Proteins ..
ودي عبارة عن بوابات بتسمح بدخول بعض الجزيئات زي ال sugar و ال amino acids وكمان بتسمح بدخول الايونات وخروج ايونات تانية البوابات دي بتبقى شكلها كده
تالت مكون هو حاجة اسمها collesterol ..
ودي مركبات دهنية بتربط ال lipid molecules مع بعضها عشان تحافظ على ترابط مكونات السل ممبرين
كده احنا خلصنا مكونات السل ممبرين ببساطة ..
الصبغة
رابع نقطة بنتكلم عنها هي ال stain ..
هنأجل النقطة دي لحد ما تدرسوا انواع ال stains
وظائفه
خامس نقطة هي ال function
وظايف السل ممبرين كتيرة منها ..
- Protection for the components of the cell
حماية لمكونات الخلية
- Helps the body in recognition its own cell
بيعرف الجسم الخلايا بتاعته ويخليه يقدر يفرق بين الخلايا بتاعته والخلايا الغريبة زي البكتيريا
- Transport of substances to or from the cell
بيساعد في نقل المواد من أو الى الخلية عن طريق بوابات البروتين اللي قولنا عليها قبل كده
وبهذا نكون قد انتهينا من ماده الهستولوجي وان كنت اسف على صغر المحاضر وذلك لعدم تمكني من احضار المذيد ولكن اعدكم بان اي شئ ساجده ساكتبه هنا ان شاء الله
تم بفضل الله وما كان من توفيق فمن الله وما كان من خطأ او ذلل او نسيان فمني ومن الشيطان واسال الله العلي القدير ان ينفع بهذا جميع طلاب المسلمين واسال الله التوفيق لي ولكم والسلام عليكم ورحمه الله وبركاته
__________________
((كلا ان معي ربي سيهدين))
|