01-10-2010, 07:18 AM
|
|
عضو جديد
|
|
تاريخ التسجيل: Feb 2010
المشاركات: 11
معدل تقييم المستوى: 0
|
|
اقتباس:
المشاركة الأصلية كتبت بواسطة abdo_ali514
السلام عليكم
|
اقتباس:
المشاركة الأصلية كتبت بواسطة abdo_ali514
يا جماعه انا مقدم في كلية الاعلام التعليم المفتوح
والمقابلة بتاعتي يوم 3/10/2010
انا بس حابب اعرف ما هي كيفية الاسئلة ؟
وبالنسبة للمقابلة ايه ظروفها ..
|
الاخ الفاضل
انا كان عندى مقابلة شخصية
بعد نجاحى فى اختبار الكمبيوتر
الخمسين سؤال
المقابلة الشخصية
اولا لازم تكون داخل المقابلة قدام اللجنة
اللى هاتختبرك وانت واثق من نفسك
بمعنى انك متكنش مهزوز وبتترعش
لان ده بيكون ظاهر عليك جدا
وبينعكس على ادائك فى الاجابة على اى سؤال
وممكن تتلخبط وتغلط وانتى عارف الاجابة
لانك خايف ومهزوز زى ما قلت
ثانيا
اول حاجة طبعا السؤال التقليدى
وهو اخترت الاعلام ليه وعايز تتخصص فى اى قسم فى الاعلام
يعنى انا مثلا قلت انى عايزة اتخصص فى
قسم الصحافة وبالاخص
اكتب فى الصحافة الرياضية
على طول سألونى
فى الاخبار الرياضية الحديثة
وكان وقتها اخر خبر عامل ضجة فى الوسط الرياضى
حل مجلس ادارة نادى الزمالك
بعد حصول مرتضى منصور على حكم قضائى
على طول الدكتورة سالتنى
انتى مش شايفة ان الصحافة الرياضية غريبة على بنت شوية
قلتلها لا لانى شايفة انه تحدى بالنسبة ليا
سالنى الدكتور
تعرفى مين من الصحفيين او النقاد الرياضيين
قلتله اعرف فتحى سند ومحمد سيف
وحسن المستكاوى
سالنى طيب المستكاوى بيكتب فى اى جريدة دلوقتى
قلتله جريدة الشروق
سالتنى الدكتورة
طيب قبلها كان بيكتب فين
قلتلها جريدة الاهرام
سالتنى طيب تعرفى والده مين
قلتلها نجيب المستكاوى
سالنى الدكتور فى نفس النطاق الرياضى
وبعدها سالنى شوية اسئلة عامة
مثلا ايه اخر حدث حصل فى مصر
طبعا قلتله سرقة لوحة زهرة الخُشخاش
سالنى عنها
مين رسمها قلتله فان جوخ
ومنين اتسرقت قلتله من متحف محمود خليل
وهما دلوقتى قبضوا على اللى سرقها
قلتله لا قالى امال مين اللى قبضوا عليهم
قلتله الناس اللى اتقبض عليها دى كلها
بتواجهه تهمة الاهمال
قالى تفتكرى اللوحة لسه فى مصر
قلتله اللى عايز يسرق لوحة بملايين لايمكن ينسى
انه يكون عامل حسابه على انه يطلع اللوحة من المتحف على المطار مباشراً
جاوبت كل ده
وكان فى سؤال موجهه للولد اللى دخل معايا فى الاختبار
عن حسن البنا
الدكتورة لاقيتنى ببتسم
والولد يا عينى مزنوق جدا
قلتلها مين حسن البنا
الدكتور قالى شوفتى حاجة فى رمضان عن الاخوان
قلتله مسلسل الجماعه
سالنى عن اسم الكاتب
قلتله وحيد حامد
سالنى حسن البنا مات ازاى
قلتله اغتيل
ووالله العظيم انا ماكنت عامله حسابى على السؤالين دول اصلا
شوف انا هاقولك على حاجة
انت ممكن تفضى نفسك انهاردة وبكرة لمتابعه اهم الاحداث
واختار تخصص واحد بس
واعرف كل المعلوات عنه
علشان لما تتسأل فيه تجاوب كويس قوى
وخلى بالك ان اى سؤال لازموانت بترد تكون واثق من نفسك
ودايما افرد ظهرك وانت قاعد قدامهم
مش تكون مرعوب ومنكش
هما محتاجين وعايزين وبيعجبهم
الناس اللى واثقة فى نفسها
انت بتدخل اللجنة ومعاك اتنين كمان
اما ولد وبنت او بنتين
ومهما يكن وانت بتجاوب جاوب وكأنك لوحدك ومحدش شايفة
لزيادة الثقة والاطمئنان
والله انا قررت كده قبل ما ادخل وقلت فى نفسى
قل لن يصيبنا الا ماكتب الله لنا
انا مش هاخاف من حد غير ربنا
ومهما يحصل اكيد كله هايكون من عند الله
ربنامعاك
وابقى طمنا انشاء الله
اختك فى الله
|