وعليكم السلام ورحمة الله وبركاته
اولا: حمدلله على السلامة واهلا بيك فمصر و فالمنتدى
ويارب ان شاء الله يكون عجبك ،
ثانيا والمهم : شوفي ياحبيبتي شيلي فكرة اني جاية من برة
ومش هكون قد المناهج وكدة
اختك فالله ال هي انا حصل معايا نفس الموقف
رجعت من برة على تانية علطول
بس مش كنت فالسعودية كنت فعمان
والحمدلله مع شوية جهد قدرت اذلل الصعوبات
ومش هكدب عليكِ هتتعبي شويتين بس كله هيروح لما تلاقي نفسك
بتحلي كويس و جبتي درجة فاخر السنة
وبالنسبة للدروس ، هتتعودي وحدة وحدة
ولازم يبقى من جواك رغبة فمسايرة الوضع
يعني تتأقلمي مع نظام تعليمنا المبجل وهما كلهم سنتين
وبيعدوا بسرعة البرق والله
بالنسبة للانجليزي خليك مع استاذ شاطر وبتفهمي منه
وكل درس تاخدي تذاكريه اول بأول و الكلمات احفظي على قد ماتقدري
والحل ثم الحل ثم الحل
حلي كتير و وري الحل للاستاذ عشان يصححلك لو مش كنتي متأكدة
والانجليزي مادة حلوة ( مع اني مش بحبها ) 
بس لو ذاكرتيها كويس بتجيبي درجات تمام فيها
والقصة بردوا خلي بالك منها وذاكريها اول بأول
بالنسبة للرياضة
شوفي ياقمر حلي رياضة كتير وانتي هتلاقي نفسك تلقائيا بدأتي تكوني كويسة خالص فيها
انا كنت دايما اقول افهم القاعدة او القانون كويس
هتلاقي المسألة مشت معاك تمام
اكيد هتحتاجي قانون طاير من هنا على هناك
وهتسألي الاستاذ وهيقول جملتهم الشهيرة : " ديه اخدتوها فسنة ...... 
شوفي ما تتحبطيش منها ،
من كتر ما هتحلي هتلاقيك عرفتيها وفهمتيها وحفظتيها
وانا والله كان بيحصل معايا كدة
بس الاستاذ جزاه الله خيرا كان بشرح القانون الجديد عالسريع كدة على قد مايلزمني
والحمدلله الرياضة كانت مادة لذيذة اوي
وهتحسي بيها فالاخر لما تبدأ المراجعة وتلاقي نفسك بتحلي مسألة ورا التانية من غير اي صعوبة ان شاء الله
بس مش تحبطي لو قابلتك مسألة كدة ولا كدة
شيء عادي جدا و بيقابل كل الطلبة
وبالنسبة للعربي هقولك حاجة صغنونة كدة
فيه نصيحة منتشرة فوسط الثانوية العامة بتقول
سيبك من العربي وذاكره فاخر اسبوعين على اساس انه اول امتحان
وده غلط ، ذاكري العربي علطول من اول السنة
وفالنهاية بتمنالك التوفيق ويارب ان شاء الله تجيبي مجموع عالي وتدخلي الكلية ال نفسك فيها
و اخر حاجة مش تنسي علاقتك بربنا و بوالديك
وربنا معاك ياعسل
وكل سنة وانتي طيبة ، وكلي لحمة كويس 
اه فيه حاجة صغنتوتة كدة
انا مش بحبذ حكاية الدرسين فمادة واحدة
بتشتتك وتضيع وقتك
لو التزمتي مع استاذ واحد كويس
هيكون افضل من وجهة نظري
وده فالاخر مجرد رأي
اقتباس:
والكلية باذن الله هتقضيها فسح 
|
كذب عليك من قال هذا !!
ماحدش راضي بحالو كنا فالثانوية نقول الكلية
دخلناها رجعنا نقول يا ثانوية
يلا ربنا يوفق الجميع