[عمر الاسيوطى]

المشاركة الأصلية كتبت بواسطة إبراهيم الزرزموني

الأخ الأسيوطي جزاك الله خيراً
نرجو أن تحكي لنا عن تجربتك هناك

المشاركة الأصلية كتبت بواسطة حليم عابد

نشكرك حبيبنا الأسيوطي نورت الموقع
وماذا عن معاملة الطلاب في المرحلة الثانوية؟

الشكر لله يا اخواني الاعزاء

تجربتي هناك كانت علي مر ست سنوات كما قلت كنت عازب ولم اتزوج الا في اخر عام 2006/2007
طوال مانت عازب ممكن تحوش وتعمل قرش من مرتبك فقط اما الدروس فهذه انت وشطارتك ورزقك اللي يبعته ربنا
لو متجوز ومعاك عيال يبقي هتتعب هناك لان العيشه غاليه والسكن اغلي وده السبب الرئيسي اللي خلاني استقلت اني تزوجت وربنا رزقني بطفله ولقيت الحكايه مش جايبه همها قلت يبقي مصر اولي بيا في وسط اهلي احسن طبعا اللي كان بيدي دروس حريقه مش هيتعب لان الدروس هتعوضه

انا بطبعي لا احب الدروس الخصوصيه كنت بديها بمزاج ومش متكالب عليها العيل اللي ميعجبنيش مرحلوش
بالنسبه للمدرسه الاداره غاليا كويتيه صرفه من الناظر لاصغر موظف ومحترمين جدا طالما انت شايف شغلك كويس محدش له عدك حاجه طبعا الكلام ده في الحكومه مش المدارس الخاصه دي وضع تاني
اما المدرسين فخليط من كل الاجناس اللي بتتكلم عربي مصري وسوري جزائري ومغربي وتونسي ومن اريتريا ومن السنغال كوكتيل يعني

غاليا الطلاب في الحضر احسن من البدو كثيرا في المعامله
الحضر مدلعين جدا البدو اجلاف جدا
في كلا الحالتين الصعوبه الكبري هي في السيطره علي الفصل هناك طبعا لا في ضرب ولا شتيمه

هناك اكتر شخص له سلطه في المدرسه بعد الناظر الاخصائي الاجتماعي هو حلال العقد اي طالب يضيقك توديه للاخصائي يتصرف معاه وهو بيعرف يتصرف كويس

المدرس هناك قوته مش بالماده العلميه بل بالقدره علي السيطره علي الفصل

واذا كان النظام هنا في مصر كما يقول البعض حضر وبدر ونام في الفصل
النظام هناك حضر واحضر وقول حاضر

لكن انا قعدت في الكويت ست سوات سبحان الله لم استطع ان اتأقلم معاها ولا احب هذه البلد
كفايه جوها الخنقه هناك لاتستطيع اغلب السنه فتح الشباك اما من الحر الشديد او البرد الشديد
حياتك كلها في اماكن مغلقه مكيفه
وعلي رأي زميل كويتي مدرس مره قالي (لولا البيزات ما قعدنا فيها) البيزات يعني الفلوس

وكان لا زميل مدرس عربي مصري له مقوله شهيره ( لولا الدينار لبلغ الناس الفرار)



طبعا الكلام ده لا يحبطكم فعلي العكس هناك مدرسين يحبون البلد جدا ويرغبون العيش فيها حتي الممات
وهناك مبدأ شهير عند البعض بيقول انا قاعد حتي اخر قطرة نفط في الكويت

فانا اذكر مدرس مصري بعد طلوعه علي المعاش هناك كان يبكي ويقول وددت لو ادفن في تراب الكويت
وانا كان ساكن معي مدرس كان سنه 70 سنه منهم 40 سنه في الكويت


كنت هناك اتمني وانا هناك بس اتمشي في شوارع مصر واتنسم عبيرها( طبعا البعض هيقولك ايه الفقري ده حد يرجع للفقر برجليه) بس اقلكم بكره تسافر وتعرف يعني ايه غربه وصدقني اي نجاح تحققه وانت بعيد عن وطنك واهلك ملوش طعم


واخر سنه لي هناك حجيت وصليت استخارة كثيرا في الحج واستقريت علي الاستقاله والعوده الي مصر
والحمد لله مستوره وبارك الله فيما رزق

واتمني لمن قدم اوراقه التوفيق

وانا تحت الامر في اي استفسار