[mr_ehab4m]

بارك الله فيك اخي الكبير مقاما استاذ المتبولي والله دائما انسان رائع
ونتعلم منك ومن باقي الاخوة العطاء دون انتظار اجر او شهره و خاصتا اعمالك من وورد او ما من الممكن استخدامها رغم علمك من ان البعض قد يستخدمها وينسبها لنفسه تدل علي العمل لوجه الله والرغبة في افادة الاخرين
وتفكيرك في الطالب ومذاكرته في هذا الوقت
مما جعلني انت وغيرك من الاخوة المحترمين احاول معاونة الاخرين ما استطعت واذا ما عملت شئ اضعه وقفا لله
وجعلني اكتب التالي متناسيا الوقت المتأخر جدا وظروف العمل غدا المبكر وبعد ان كتبته لم اكن اتوقع كتابت كل التالي

تسمح لي اضيف
بخلاف التنظيم والمكان المناسب والوقت المناسب وخلافه من عوامل المذاكرة السليمة
هيكون كلامي للطالب نفسه كخلاصة خبرتي المتواضعه

اكتر شء سيئ هو انك كطالب بتعمل الواجب قبل المذاكرة في اغلب المواد واقلهم في المذاكرة هي الرياضه لأن حفظها قليل فيجب مذاكرتها اولا ثم الواجب

من الحجات الي بتخلي الطالب يتقن مذاكرة الرياضيات

اعادة حل بعض المسائل المحلولة بمفردك بعد مراجعتها ودون النظر اليها وقت حلها وذالك قبل عمل الواجب

بنصح بعدم عمل الواجب من خلال النظر للمسئلة المشابهه لأني بعتبر ده غش جزئي بمعني ماتجبشي مسئلتين برهان مثلا او اي نوع واحده محلولة والتانية واجب وتحل زي المحلولة بالظبط ( في الحل ربع فانا كمان اربع ) لأن كده مش هتستفاد كانك بتغش ولكن الاصح هو السابق مذاكرة الحصة وحل بعض المحلول مره اخري بمفردك

عند قرائة مسئلة هندسة يتم قرائة المعطي ثم تنظر للرسم ثم تقرء المعطي الاخر وتنظر للرسم وهكذا وفي كل معطي تفكر ما هي فائدته وقبل بدء البرهان طبعا تنظر الي المطلوب اولا فلا تكتب اي نتائج علي المعطي فهناك نتائج ليس لها فائدة وقد تضلل فتكتب الي عيزه في المسئلة وسيب الباقي

عند قرائة مسئلة برهان محلولة قبل قرائة حلها اقرء المطلوب اولا ثم اعد قرائة المعطيات وبالقلم قسم البرهان المحلول الي اجزاء بوضع خط بين كل فقرتين

ايضا عند الحل بقترح علي الطلاب بعد انهاء كل جملة من المعطي والنتيجه ( بما ان و ذا ) يسيب سطر فيتحول البرهان كأنه برجرافات فيسهل مراجعته بعد ذالك وتقسيمه

وفي البرهان اوعي تكدب وتصدق نفسك وما تقولشي هما شكلهم في الرسمه متساويان ( هو قال متساويان ولا لأ )
واسئل نفسك ليه فيكون (بما ان ،، اذا ) عشان ما تقلبشي المسئلة

اعمل لنفسك كشكول في كل المواد او لكل مادة واكتب فيه اهم ملاحظاتك

وهام جدا ما تستكبرشي ولا تتكسف بس احسن اختيار وقت السؤال مش يبقه المدرس في وسط الخطوة وتقطعه دون استأذان وتسئله

ولو فرضنا ان فيه جزء ما فهمتهوش ومسئلة محلولة امامك سيب الجزء ده وعلم عليه وكمل المسئلة ايضا وافهم بقيتها

احترم مدرسك واياك تستكبر وتعامله كأنه واحد صحبك اذا كنت في لحظه هتفكر انك تطنشه اعرف انه في غني عنك وعن غيرك وخد بالك انه عنده ظروفه الخاصه ومشاكله فهو بشر فأكسبه واحترمه فيحترمك ويقدرك ويلبي طلبك واكيد طبعا لو حس انك بتتنك عليه هو كمان مش هيهتم بيك وانت الي هتخسر مش هو

دور علي المدرس مش تخليه هو الي يدور علي ويسئلك ويسمعلك انت الي هتمتحن مش المدرس

كثيرا كثيرا بيكون المطلوب الاول مش مرتبط بالثاني فاذا ما وقف معاك الاول ما تقفشي وتسيب السؤال فاضي شوف الثاني

في البرهان حاول تضع اغلب المعطيات علي الرسم واوعي تمسك قلم جاف وتعلم بيه علي الرسمه هتبوظ ومش هتشوف حاجه استخدم قلم رصاص

مهمه قوي استخدم الاسلوب المناسب
بمعني عند شرح مسئلة بقلمك اكتب جنب المسئلة ملاحظاتك باسلوبك انت وبأي لغه تفهمها( مثلا طير السالب لما ربع ) مش لازم المدرس يقولك اكتب ويمليك عشان تكتب

وايضا استخدم اكبر عدد من حواسك
وده كلام علمي بس هبسطه
بمعني اوعي تقول علي بيكلم نفسه وهو بيذاكر انه اهبل دا يبقه انت الي اهبل

كلم نفسك فهتستخدم حاسة السمع (بس براحه )
شاور وحرك ايدك فتستخدم اللمس وتحفز البصر (وممكن تعمل حركة معينه تفكرك بشئ زي خطين في الهوا كعلامة التساوي)

حرك صوابعك كانك ماسك قلم خاصتا عند النظري والحفظ فتقوي ذاكرة اليد (زي ذاكرة مخك)

غني بعض الجمل المحفوظة ولحنها فيسهل حفظ النظري ( شغبط شغابيط)

لخص المعطي والمطلوب (بعد = بعد اذا وتر=وتر)

استخدم نفسك (شهيق وزفير ) في تقسيم الجمل لأجزاء انا بستخدمها مع سنه اولي وخاصتا في ضرب مقدار مكون من حدين في اخر مكون من حدين عشان يفصل بين الضرب وقواعده ومجموع الطرفين والوسطين

واخيرا وليس اخر النصائح

اعمل كل الي في وسعك عشان لما تقابل ربنا تقول له حاولت
واعرف ان مجهودك ودرجتك اولا واخيرا ليك انت مش لبابا ولا لماما فلوا موجودين تذاكر ولو سبوك تطنش

واعرف وده شعاري الشخصي في الحياه
ربنا ما بيحاسبنا ع النجاح والفشل
ربنا بيحاسبنا ع السكون والعمل

وارجوا انك تكون استفدت
واقترح ان امكن تطبع للطلاب