[مكعبات]

المشاركة الأصلية كتبت بواسطة princess amira

السلام عليكم و رحمة الله و بركاته
فكرة الموضوع ده حلوة جدا و شكرا لصاحب الموضوع على طرح الفكرة

انا مشكلتي متتحلش لان فات الاوان...انا بس عايزة ارائكم في الموضوع ده

انا احدى طلاب ثانوي اللي قرروا انهم ميبذلوش اقصى جهدهم في اولى ثانوي و يوفروا جهودهم لتانية و تالتة
و بصراحة لما بدات سنة تانية مكنتش اتوقع ابدا اني ممكن اسيب السنة تعدي مني و بعدين ابذل اقصى جهدي في المذاكرة في اخر 3 او 4 شهور زي ما ناس كتير بيعملوا..بس ده فعلا اللي حصل...لقيت السنة بتعدي مني شهر و لا شهر بس انا الحمد لله ادركت الازمة اللي انا فيها في اواخر 12 و معتقدش اني اتاخرت اوي في ادراك المشكلة...مش كدة و لا ايه؟؟
المهم مشيت حوالي اسبوعين كويسة في المذاكرة الا ان حادثة الكنيسة في اسكندرية حركت مشاعري و طبعا انا في الفترة دي انشغلت باللي بيحصل و تقريبا مفتحتش كتاب لمدة 4 ايام على التوالي
المهم بعد فترة استقر الوضع فرجعت تاني انظم نفسي و اذاكر تاني بس ضاعفت الجهد تعويضا للايام اللي ضاعت
الوضع ده كان مستقر لغاية يوم 25 يناير .... بصراحة من اليوم ده و انا مش عارفة اذاكر خالص و طول الوقت قدام التلفزيون بتابع اللي بيحصل في بلدي تقدري تقولي كدة ان انا تقريبا لمدة 10 ايام مفتحتش كتاب الا لما الاسرة الكريمة كانت بتانبني على الوقت اللي بيضيع و بيقوليلي ان اللي بيحصل ده مش هينفعني و لازم مفكرش في حاجة غير في الثانوية العامة و المذاكرة و بس فكنت بضطر امثل اني بذاكر و طبعا انا مكنتش بذاكر
بس اقتنعت بكلامهم في النهاية بعد ما عدى 10 ايام من غير مذاكرة فقررت اسيب البلد و اللي بيحصل فيها و انتبه لمذاكرتي و ثانويتي العامة
و انا تقريبا دلوقتي بقالي اكتر من 4 ايام حابسة نفسي في اوضتي و كتابي في ايدي و قهوتي و نسكافيهي و شايي جنبي....تقدري تقولي كدة ان انا فعلا دلوقتي بقيت طالبة في ثانوية عامة
معلش طولت عليكي بس انا بجد عايزة اعرف هو فعلا موضوع اني اسيب السنة كلها و مجتهدش فعلا غير في اخر 3 شهور ده بينفع و لا بيبقى مجرد صدفة و لا مسالة حظ و لا ايه بالظبط!!!(مع العلم ان ده بجد كان غصب عني يعني انا مكنتش ناوية خالص اني اعمل كدة بس لقيت ده بيحصل تلقائيا و ان شاء الله باذن الله تعالى ده مش هيحصل في تالتة اصل مش كل مرة تسلم الجرة..المهم بس ان السنة دي تعدي على خير).
شكرا ليكي مرة تانية على الطرح الرائع ده و اتمنى انك تشاركيني برايك و ممكن اي حد كمان يقول رايه و هكون سعيدة جدا

السلام عليكم

المشكله اللى حصلتلك من يوم 25 يناير حصلت للجميع
و انشاء الله لو الواحد اجتهد شويه هيعوض الايام اللى فاتتو
اما بئه موضوع ان الواحد يجتهد اخر 3 شهور
فده على حسب قدره الواحد على التحصيل
انا اعرف ناس عملت كده و جابت 94 ف الميه
بصى لو انتى فعلا ابتديتى بجد
من غير تضييع وقت هتجيبى مجموع كويس وممكن يوصل ل 95
و ربنا يوفقك
و انا ف الخدمه