النهاردة ف عز نومى
مال عليا وقالى " جاى "
قالى " قومى اتزوقيلى
والبسيلى عقد ضى "
قلت : " احلف "
قالى: " جاى "
قلت : " فعلا ! "
قالى : " فعلا .. أيوة جاى "
قلت : " ياما حلفت ليا وخدت منك ألف وعد
بس كنت بتخلى بيا وزاد بعادك عنى بعد "
قالى " ما انتى كنتى نايمة وكنتى رافضة تقولى لأ
كنتى شايفة الضلمة نور
كنتى سامعة الكذب حق "
بس فجأة صحيتى تانى بعلو صوتك قلتى " أى"
كيدى يامصر الأعادى وقومى قولى " بكرة جاى "
واحلفى بقومة ولادك اللى هبوا بقلب حى
قالوا مش عايزين مبارك
قالوا يسقط للى شارك
ف المذابح والمجازر
واللى قالوا بحس هادر
" احنا فيها وانت لأ "
واللى رافضين المهانة
أو يكونوا سد خانة
أو يموتوا أو يعيشوا
زى أهل الكهف لأ
قومى يامصر النهاردة وشدى حيلك واحلفى
إنك انتى بإيد ولادك راح تكونى عالية دايما واهتفى
" حرة حرة .. كنت حرة وعشت حرة "
مهما حاولوا اللى برة واللى جوة يخلوا شمعك ينطفى
قولى يامصر بعزيمة وهمة عالية وقلب حى
إنى جايلك .. أيوة جايلك
قومى قولى بكرة جاى
سناء مصطفى