صباح الخير
صباح الخير علي الورد اللي فتح
في جناين مصر
صباح العندليب يشدي
بالحان السبوع يا مصر
****
صباح الدايه واللفه
ورش الملح في الزفة
صباح يطلع بأعلامنا
من القلعة لباب النصر
***
سلامتك يا مه يا مهره
يا حباله
يا ولادة
يا ست الكل يا طاهرة
***
سلامتك
من آلام الحيض
من الحرمان
من ألقهره
سلامة نهدك المرضع
سلامة بطنك الخضرا
هناكي وفرحة الوالدة
تضمي الولد
يا والده
يصونهم لك
ويحميهم
يكترهم
يخليهم
يجمع شملهم
بيكي وبيهم
و يتمم فرحتك
بيهم
صباح الخير علي ولادك
صباح الياسمين والفل
تعيشي ويفنوا حسادك
ويسقوهم
كاسات الذل
****
صباح الخير
على بوابة الثانوية
وأهلا بيكو في القلعة
وباللي في الطريق جايين
ما دامت مصر ولاده
حتفضل شمسها طالعه
برغم كيد الحاقدين