[حسام الدين 3]

السلام عليكم و رحمة الله و بركاته


و ألف مبروك الحرية للمصريين
و كل 30 سنة و انتوا طيبين

و قبل ما أبدأ كنت عاوز أقول حاجة لـ(عزيزي المستمع) ,
طبعا أنت (مصري) و (مسلم) و (عربي) في نفس ذات الوقت

طيب لو قلت لك : رتب الانتماءات السابقة حسب الأولوية لديك
هترتبهم إزاي ؟؟

بالنسبة لي أنا فالوضع كالآتي :
مسلم ثم مصري ثم عربي


طبعا هتلاقي واحد يقول و ليه ترتبهم أصلا ؟؟
ما هو كلنا فينا التلات حاجات دي على التوازي مش على التوالي ,
لأني مولود في مصر , و ديانتي الإسلام , و بتكلم عربي
يبقى مافيش حاجة من الحاجات دي بتعارض بعضها

و أنا معاك ,
فعلا مافيش تعارض و كلهم موجودين في وقت واحد
لأن الجنسية : مصري , و الديانة : مسلم , و العِرْق : عربي
يعني كل واحدة تندرج تحت تصنيف تاني خالص

بس خدني على قد عقلي و رتبهم بس الأول , و أنا أقول لك ليه ؟؟

ببساطة ياسيدي لأن الشيطان صايع و شاطر و تيييت كمان ,
فبيخلي أحد هذه الانتماءات يستخدم ( قاعدة البوز )
the bose base
و ( يكسر ) يمين أو شمال على الإنتماءات الأخرى ,

فمثلا واحد مسلم و مصري عادي و مافيش تعارض زي ماقلنا ,
علشان يثبت إنه (مصري و أبويا مصري) بيروح يتلزق في الفراعنة و يفتخر بيهم
بينما هو في نفس الوقت (مسلم) , و بيؤمن بسيدنا موسى عليه السلام- و كل الأنبياء -
و إن الفراعنة كانوا كفار و كفروا بالله و برسالة سيدنا موسى اللي هو بيؤمن بيها
لكنه بكده , يبقى سمح لجنسيته أن تطغى على أجزاء من دينه

علشان كده أنا قلت لك إنك لازم ( ترتب انتماءاتك ) من البداية

خد عندك ياسيدي مثال تاني بيتعلق بالأحداث الجارية


أنا (مسلم)
و الإسلام بيقول :
{ إِنِ الْحُكْمُ إِلَّا لِلَّهِ } [الأنعام:57]
{ وَأَنِ احْكُمْ بَيْنَهُمْ بِمَا أَنْزَلَ اللَّهُ وَلا تَتَّبِعْ أَهْوَاءَهُمْ وَاحْذَرْهُمْ أَنْ يَفْتِنُوكَ عَنْ بَعْضِ مَا أَنْزَلَ اللَّهُ إِلَيْكَ } [المائدة-49]



و أنا برضو (مصري) :
و يأتي واحد و يقول لي :
احنا معانا 6% مصر مش مسلمين
و علشان خاطر ما يزعلوش
يبقى نخلي (جنسية) الأغلبية الـ94% تطغى على (ديانتهم) ,
و يلغوا المادة الثانية من الدستور التي تنص على أن :
( الإسلام دين الدولة،
واللغة العربية لغتها الرسمية،
ومبادئ الشريعة الإسلامية المصدر الرئيسي للتشريع )


مع إن برضو الموضوع ما كانش فيه تعارض أصلا ,
أولا :لأن الإسلام هو دين الدولة الطبيعي لأن الأغلبية مسلمة ,


- رابط موقع أمريكي يوضح نسبة المسلمين في العالم , قف بالمؤشر على مصر -
http://pewforum.org/Muslim/Mapping-t...on%282%29.aspx


و ثانيا : لأن الدين الإسلامي لا يضطهد و لا يتجاهل النصارى و لا غيرهم من أصحاب الديانات الأخرى
بل بيّن الأحكام التي تتعلق بهم , و الأشياء التي يخضعون فيها لأحكام الإسلام
و الأشياء التي يخضعون فيها لأحكام دينهم
قال تعالى : { وَلْيَحْكُمْ أَهْلُ الإنجِيلِ بِمَا أَنزلَ اللَّهُ فِيهِ } [المائدة-47]
{ إِنَّا أَنْزَلْنَا التَّوْرَاةَ فِيهَا هُدىً وَنُورٌ يَحْكُمُ بِهَا النَّبِيُّونَ الَّذِينَ أَسْلَمُوا لِلَّذِينَ هَادُوا
وَالرَّبَّانِيُّونَ وَالْأَحْبَارُ بِمَا اسْتُحْفِظُوا مِنْ كِتَابِ اللَّهِ وَكَانُوا عَلَيْهِ شُهَدَاءَ }[المائدة-44]



يبقى ليه الخلط بين ما يختص بالدين و الجنسية و العرق ؟؟
و ليه نسمح لانتماء إنه يطغى و يتعدى على اختصاصات انتماء آخر ؟؟

خصوصا إن كان هذا الانتماء الآخر المُعتدى عليه هو ( الدين )
الذي خلقنا الله من أجله , و سيحاسبنا عليه في النهاية !!؟؟

و أخيرا دعوة للمشاركة في حملة لإنقاذ مصر من السقوط في هاوية العالمانية
و منع إلغاء المادة الثانية من الدستور المصري

http://www.facebook.com/IslamicId

فإن إخواننا في ميدان التحرير لم يضحوا بأرواحهم لتكون مصر عالمانية



نرجو النشر



و جزاكم الله خيرا

منقول من مدونة تظبيط