الحلم المستحيل
هو حلم كبير علينا
نعيش زي أي انسان
من سنين دقنا الهوان
لما حد جاه و قالنا يلا بينا
يبقى عميل الأمريكان
يبقى خاين أو جاسوس أو جبان
لما سمعنا عن فلوس كتير متهربة
سألتني أمي يعني كام
يشتروا كم رغيف
هي الفلوس دي تكفي حق الغطا و لا الدوا
أو كسوة مرة كل كم سنة
قلتلها ياما دي فلوس كتير مالهاش عدد
ممكن تكفي شعب كافح من زمان
شعب جاع سنين طويلة
شعب حفر قناة و رجع عبرها
شعب حارب أعداء كتير
شعب شال فاس و قلم و بندقية
شعب سافر بلاد كتير و ساب ولاده
شعب طاطا راسه في بلاد غريبة
علشان بلاده ضاقت عليه
مع انها بلاد كبيرة تكفي اللي فيها
بس اللي يحكم فكر انه لوحده
و ان الخلايق كلهم دول ملك ايده
هو حلم كبير علينا ؟؟؟؟؟؟؟
لما نسأل فين ولادنا ؟
اللي غرق و اللي اتحرق و اللي اعتقل و اللي اتسرق
يبقى لما ييجي حد منا يقولنا يلا بينا
يبقى عميل الأمريكان
يبقى رخيص
ينضرب يترجم يتحبس يتهان
هو حلم كبير علينا ؟؟؟؟؟؟؟
هو لسة الشعب عايش ؟؟؟
لسة فيه شباب يطالب ؟؟؟
لسة فيه الحق غالب ؟؟!!!
لسة يعرف يعني ايه كلمة كرامة ؟؟
لسة بيفكر يخطط أو يطالب
لسة ما شافوش العلامة ؟!!!
اني وحدي فوق اي حد أو أي حق
شعب عايز و عايز و عايز
شعب عايز مكان
ما عـنده المكان
طوابير كتير مالهاش عدد
طوابير كتير في كل شارع
و لكل حاجة
للعيش طابور و الجاز طابور
حتى العجايز ليهم طابور
في كل شهر لمرتباتهم واقفين طابور
شعب جاحد نسي عملت ايه ؟
رشوة و حرايق جوع و فقر شوف أد ايه
يبقى حلم كتير علينا ؟!!!!!!!
ان الشعب عرف الطريق
صوته علي شق السكوت
راح الميدان
طالب و عامل مسلم مسيحي
كبير صغير
راجل و ست
أحمد و سلوى
شوقي و منال
و محمد و بطرس كمان
كل دول انا شفتهم واقفين هناك
و شفت ايه فيهم عمل النظام
سلط عليهم كلابه و خيله و جماله
سلط عليهم نيرانه
بقسوة مالهاش مثيل
مات محمد على كتف مايكل
و شفت عادل شايل ميشيل
كل دول كان حلمهم في يوم يلاقوا
لقمة و هدمة و سقف يستر عرضهم
كان حلمهم في شغل فيه يلاقوا رزقهم
بس اللي بيحلم عندنا ده جزاءه
ضرب و إهانة و معتقل و كمان إبادة
داس على حلمهم تحت البيادة
يبقى بجد كتير علينا
نحلم في يوم من عبيد نتحول لسادة
الطــــــــــــــــــــــــــــــــــــوارئ
كلمة كانت زمان بتعدي علينا
في كتب المطالعة و التاريخ أو قصيدة عن الوطن
كلمة موجودة في معجم أو قاموس
كلمة اتنست من زمن
كلمة ضاعت من حياتنا بأبخس تمن
كلمة اتمحت و انداس عليها
لما قالوا فيه قانون اسمه الطوارئ
يعني إيه كلمة طوارئ
دي مرادف كلمة مهانة
أو للزعيم هي الحصانة
يعني اسمه قانون الإهانة
اللي خلانا نطاطي راسنا و ندمن الاستكانة
اللي سلح كل جاهل ببندقية
وضهره لعدوه
بندقية متوجهة لوش صاحبه أو جيرانه
كل حاجة و اي حاجة مسموحة لحفظ النظام
احتقار ، اعتقال ، زنزانة باردة في عز الشتا
لقمة ناشفة تترمي من تحت باب و مافيش غطا
هو ده قانون الطوارئ
سنين طويلة على قلبنا كاتم نفسنا
كل ده لحفظ النظام
يبقى لازم القانون يتفصل تمام
تلاتين سنة و يا عالم هيزيدوا كام
خلى المبادئ حطام
كسر القلم كتف ايدينا و لجم اللسان
عرفت ايه معنى الطوارئ
كل ده لحفظ النظام
طيب ايه هو النظام ؟
النظام ده شخص واحد مش دولة كاملة
يعني الطوارئ و الإهانة لشخص واحد ؟
مش أي واحد ، ده رمز كامل
ضاعت في عهده المسئولية و الاحترام
خلى المواطن ملطشة لكل عابر
خلى الشوارع مزبلة و حفر و ركام
خلى العساكر مدة ايدها عيني عينك
و اللي يعدي لازم يراضي اللي قاعد
باعوا البلاد و العباد و شوف بكام
خلوا الخلايق شوية ورق وسط الزحام
قطورات تولع ، بواخر بتغرق و الباشا نايم
كل اللي الحاصل ان الكبير في الكرسي لازق
دساتير نصلح قوانين نفصل
حتى القذارة في البرلمان
زور و نقي كل اللي يعرف يقول آمين
رافض يسلم لحد تاني
كل اللي شاغله انه يسلم الكرسي لابنه
ابنه و صاحبه فاكرينها سايبة
فاكرينها عزبة أو تكية
ما يعرفوش ان الشعب ثاير
راحوا و رفعوا صوتهم بكل المظالم
نادوا و هتفوا انه يرحل كل ظالم
يارب نصرك انت اللي عالم
ان الغلابة مالهومش غيرك
و امحي اللي منعوا عن الخلق خيرك
عويس والي - بني سويف