وبتقولوا مفيش فايدة –شعر إلهام صلاح
صبرنا كتير
وبتقولوا مفيش فايدة
ونارنا تقيد
وليه ناركم مهش قايدة
وليلنا يطول
وليه نهاركم بعيد عنا
****************
بحور الصبر
مليانة قلوب تايهة
قلوعها تدوب
وما بترسى على المرسى
يا مرسى هربت ليه منا
نمد إيدينا
ليه ترفض تساندنا
وعمر يضيع
وجرح يزيد
وزهر يموت
ودمع يسيل
وأوهامك تعذبنا
**********
وفى وشوشنا
وحوش الجوع
وقهر الخوف
ولا تقدر تلجمها
قيود الشر
بتسلسل فى أنفاسنا
وفى نهاية نفق مسحور
بنلقى الصبر يحرسنا
**********
يداوى جروحنا
ويواسى
يجمع صحبتى وناسى
وأنا ناسى
مرار الصبر
فى كاسى
***********
بنات فكرى بتحكى لى
أنا فكرة تحليلك
تعطر طرف منديلك
تمد الزيت لقنديلك
**********
وطول الليل
مهش منك
ولا منى
بذور الشك
يا أسمر بتقتلنى
بتحرقنى
سلاسل غيرة تعصرنى
*************
تقوللى الفقر
بلاش تضحك على روحك
تزود شكوتى بنوحك
أنا مقتولة من عجزك
*********
ومعول هد طال يدى
وخط الرجعة تاه منى
أساعدك مين
يا ريت إنت تساعدنى
تقولى إزاى
سؤالك وحده طمننى