[.Maha.]

المشاركة الأصلية كتبت بواسطة naglaa mahmoud

السلام عليكم يا بنات ربنا معاكو انا ام لطفلين تالته واولى ابتدائى اول سنه لينا فى السعوديه وخايفه اكون ظلمتهم علشان خدتهم من مدارسهم واصحابهم لكن ظروف عمل باباهم كده وانا اللى بذاكر لهم وبحاول اعوضهم عن المدرسه علشان مستواهم ميقلش بس عاوزه اسألكو انتو مستواكو ايه مع اللى فى مصر وكمان حالتكو النفسيه عامله ازاى بعد السنين دى لما بتنزلو مصر ليكو اصحاب ولا لوحدكو انا خايفه علهم ميعرفوش يعملو اصحاب لو طولنا هنا خصوصا بعد اللى حصل فى مصر مش بنفكر نرجع دلوقتى ردوا عليا لو سمحتو

أنا كنت في الأول في مدرسة سعودي بجانب المدرسة المصرية , يعني بدرس المنهجين وبمتحن فيهم , مع ان دة ممنوع , ولما اكتشفو الحكاية دي جالي قرار استبعاد من الوزارة مع المنع من التحاق بأي مدرسة سعودية في وقت لاحق ..
مش هكدب عليكي هو فرق كبير جدا , انا اه كنت بتعب أوي في المذاكرة خصوصا انو جت عليا سنة كنت بمتحن الصبح في المدرسة السعودي امتحانات نص الترم التاني , وأنا عندي بعد العصر لجنة في السفارة ,طبعا مكنتش بنام ..
دلوقتي بقالي سنتين قاعدة في البيت , من غير صحاب , وكنت في عمارة كلها هنود , احنا بس الي عرب , نقلنا عمارة جديدة بقالنا 3 شهور , كلهم مصريين وسعوديين , بس محدش بيكلم حد ومبيردوش السلام علينا أصلاً ,,
القعدة في البيت تخنق بجد , ولما بنزل مصر في الصيف مليش أصحاب غير وحدة بس دي الي بخرج معاها , وأغلب الصيف أصلا بتقضيه عند أهل مامتها في كايرو , دي كانت سفارة زيي , وفي نفس مدرستي في مصر , بس أكبر مني بسنة وقاعدة في الرياض , والسنة دي حولت منهج سعودي , لما بتسافر كايرو مش بلاقي حد أخرج معاه أو اكلمو , وكمان ملناش جيران , يعني مليش علاقة بأي حد تقريبا
وأصحاب اللجنة على أد الامتحانات بس , مش بشوفهم ولا بكلمهم , كلهم في مدارس تبع السفارة , أكيد سمعتي عنها , أي واحدة تأجر فيلا وتعملها مدرسة , وكل شوية الهيئة تنط تقفلها عشان ميكس وعشان من غير تصريح , أكيد حضرتك عارفة انو مينفعش يطلعو تصريح عشان جامعة الدول العربية تمنع وجود مدرسة عربية داخل دولة عربية أخرى ,

وأدينا بنتعايش أهو , هنعمل ايه ؟؟

هو حضرتك فين في السعودية ؟؟