[مستر/ عصام الجاويش]

الثورة و الثورة المضادة – تحليل مخاطر
تخيل حضرتك لو كنت مكان النظام القديم و تعالى نحسب المخاطر اللى ممكن تتعرض لها بسبب الثورة و الامكانيات اللى عندك عشان تقاوم بيها الثورة
المخاطر:
مصادرة اموال (بالتريليون جنيه), احكام قضائية تصل للاعدام, فقد للمنصب و النفوذ, مذلة و مهانة
الامكانيات:
اموال طائلة, اتصالات و علاقات و غطاء اعلامى, قدرة تنظيمية هائلة, خبرة عريقة فى المكائد و الدسائس
شبكة من الاتباع مازالو فى مناصبهم(وزراء, محافظين, مدراء امن, اعضاء مجالس محلية,....), عناصر مسلحة من البلطجية و المرتزقة و منحرفى الشرطة
طيب دلوقتى تخيل سعادتك انك مكان اسرائيل(معلش سامحنى) و تعالى نحسب المخاطر و الامكانيات
المخاطر:
احتمال كبير لانهيار معاهدة السلام(او الاستسلام) و ما يتبعه من صداع مزمن لاسرائيل, وقف امدادات الغاز(او على الاقل رفع الدعم), احتمال قيام كيان عربى موحد فى ظل النظم الثورية الجديدة, انتهاء حلم اسرائيل الكبرى
الامكانيات:
علاقات دولية و منظمات مشبوهة, شبكات تجسس و مليشيات تخريب, سيطرة اعلامية, جيوش و اساطيل, كافة الامكانيات الامريكية, و الاهم هو كل امكانيات نظام مبارك

دلوقتى بقى تخيل انك مكان الثورة و احسب موقفك
المخاطر:
كل امكانيات النظام القديم زائد امكانيات اسرائيل
الامكانيات:
صالح الدعوات, العدد
و للاسف العدد ده سلاح متاح لفترة محدودة و بعد كده مش هنلاقيه, ببساطة اتباع النظام اكيد بيقومو دلوقتى بعمليات رصد و تحرى لاهم نشطاء الثورة و بعد شوية هيبتدو يتعاملو معاهم إما بالاغراء او التهديد او التصفية و طبعا لا يخفى على احد ان عندهم طرق شيطانية, تخيل سعادتك لو الف شاب من اهم نشطاء الثورة اللى بيقوموا بعمليات التنظيم و الاتصالات و التفاوض تم تحيدهم بعيد عن الميدان, هل تعتقد ان الثورة دى ممكن تستمر بعد كده او يطلع لها صوت؟ ولو الاصوات سكتت هل تعتقد ان فيه اى حاجة ممكن تمنع نظام مبارك انه يرجع للحكم تانى بكل اريحية؟,
عشان كده لازم ضغط العدد يستخدم بشكل كويس جدا و فى فترة محدودة جدا لتكسير عظم نظام مبارك و تفتيته قبل ما تحصل اى مفاجئات, كمان لازم يحصل تفريخ لناشطين جدد و بمعدل سريع جدا عشان النظام القديم ما يبقاش عنده اى امل فى السيطرة على عدد محدود من الناشطين,
اذا مش قادر تكون واحد من الناشطين فتأكد ان دعائك مهم جدا لاكتمال الثورة.