[هانى الشرقاوى]

المشاركة الأصلية كتبت بواسطة mr. Ali 1

المشكلة مش مشكلة توك توك ( مع ان المفروض يتم وضع ضوابط له زيه زي السيارات ووسائل النقل , مش كل عيل يركب توك توك ) الخطف موجود من قبل وجود التوك توك . فيه عندنا بنت اتخطفت بسيارة ميكروباص , يبقي نولع في الميكروباص كمان ؟!
المشكلة عندنا مشكلة أمن ومشكلة ان ناس كتير بتكون شايفة وبتعمل نفسها مش شايفة وكل واحد يقول وأنا مالي . وأكيد اللي خطفهم أخدهم من منطقة موجود بها ناس .
والمفروض ان أي بنت تركب توك توك وتلاقي السواق اتجه لاتجاه غريب , تصوت علي طول وتلم عليه الناس .
ربنا يرجعهم بالسلامة ويطمن أهلهم عليهم ويحفظ كل البنات .
شكراً علي الموضوع يا يارا واسمعي كلام بابا وماما .

والله العظيم يا مستر
فى يوم كنت فى المرج القديمة ..
كنت هناك حوالى الساعة 10 الصبح كده
والشارع مليان ناس ... ناس كتييييييييييرة
كنت واقف بشترى حاجة من السوبر ماركت
وأنا سامع صوت صريخ مكتوم ... وعمال يقرب كل شوية ...أنا طول الوقت مفكر إن دا صوت طفل
اشتريت الحاجة وببص لقيت توك توك ماشى قى قلب الناس ... وفيه شابين شكلهم متشرد ... خطافين ست كبيرة يمكن فى ال40 .. واحد ماسكها ومكتفها بايده ... والتانى حاطط إيده على بقها عشان متصرخشى
أبص للناس كل واحد عمال ينفض ايده ويقول .. لا حول ولا قوة إلا بالله .. وساكتين ... وكأن مفيش حاجة
التوك ماشى بسرعة بسيطة .. والمنطقة سكنية .. وشعبية .. ومليانة ناس أكتر من الهم على القلب ..لكن لا حياة لمن تنادى .. سئلت راجل واقف جنبى ... الشارع دا بيودى على فين يا حاج ؟؟
ومسكت التليفون وكلمت الشرطة ... هو فهم إنى بكلم الشرطة ... أخد منى الموبايل .. وقالى خليك فى حالك يابنى ... دى عيال ولاد حرام ... وانت شكلك مش من المنطقة .. فمتعملشى لنفسك مشاكل بدون داعى
زهلت من الموقف ... واتصلت تانى بالشرطة .. الأمين .. قالى : طيب هنعمل اللازم ... وقفل على كده

الغريب يا مستر
أن الحادثة دى كانت قبل الثورة
وفى عز جبروت الشرطة وفى عز جبروت وزارة الداخلية !!

والله يخربيت التكاتيك دى