[حووور الجنة]

السلام عليكم و رحمة الله و بركاتة

ياارب تكون الحلقة الاولي عجبتكم


الحــــــــــــــــــــــلـــــــــــــــــــــــق ة الـــــــــــــــــــــــــــــــــــثانــــــــــ ـــيـــــــــــــــــــــــــه
وصلت الكلية ... كلية حاسبات العظيمة .... (( و دي للعلم الكلية بتاعتي الله يكون في عونا بصراحة )) ...داخل في وسط زمايلي من الضحايا.. حاجة بتجمعنا كده كحاسباتية أو غالبنا يعني لينا
سمات باينة

الظهر المعووج->من شيلة اللابتوب
العينين الحمرة-> من القعدة على الجهاز
وش مرهق على الأغلب ->من مجهود الكلية
تتنيحة لا مغزى لها و هموت و أعرف دي من ايه



********

و كالعادة بمجرد معدي على مسجد الكلية أفتكر إني مصلتش الصبح ولا اتوضيت أساساً، و لسه بلف عشان أروح
أتوضى و أصلي

ياسر: نديم باشا
أنا: صباح الفل
ياسر: صباح القشطة
أنا: جي بدري يعني على غير العادة
ياسر: منا كنت مطبق بقى قلت لو نمت مش هاجي انهاردة و ميرضيكش درجات اللاب تروح اونطه
أنا: و أنا بقول ياسر و الساعة 8 و الا كمان مش راكبة : )
ياسر: رايح فين ؟
أنا: هتوضي و أصلي
ياسر بنظره استغراب: تصلي ايه؟
أنا: الصبح،متعطلنيش بقى


و سبته و مشيت


غالباً ياسر مش مستغرب عشان أنا مصلتش الفجر..بس هو متعود يشوف الناس بتروح تصلي في نص اليوم بس مش أكتر..ربنا يهديه...هو أنا أي نعم ضايع..بس معلش بقى كله إلا الصلاة.. بصراحة الناس اللي مبتصليش دي يعني ايه الاستهبال ده..ساعات كتير بقعد أفكر مع نفسي الناس اللي مبتصليش دي مبتصليش لييه.. أصل هما مدام عارفين إن ربنا اللي خلقهم و إنه إلههم و نعم ربنا مغرقاهم و محدش مش عارف إنه هيجي يوم اللي يتحاسب فيه..

هي صعبة أوي يعني..الصلاة بتاخد 5 دقايق، قول بالوضوء 10 دقايق، 10 في 5 صلوات يعني اجمالي حوالي ساعة من ال 24 ساعة بقابل فيهم ربنا.. صعبين..خلاص يعني مشغول أوي مش عارف أفضي نفسي ساعة..والله عيب أوي.. و بعدين أنا كمان اللي مخليني حالف منا سايب الصلاة مهما هببت ايه في عيشتي إن سمعت من الشيخ في صلاة الجمعة مرة إن اللي بيسيب الصلاة ده العلماء بيقولوا كافر بس كافر كفر أكبر ولا أصغر دي فيها خلاف..

بس فكرت كده..أنا أبقى كافر؟ أعوذ بالله..ده جنان ايه ده اللي يخليني أبقى كافر قصاد إني مقفش أصلي ساعة في اليوم.. كتير بلاقي نفسي مش قادر.. بس لأ الموضوع كبير و مش سهل ..هو أنا ضامن هموت امتى.. يا رب احفظنا من العذاب..


***************

بعد الصلاة دخلت في دوامة السكاشن و المحاضرات و جت آخر محاضرة و دي بتبقى حبيبتي، أي نعم أنا ببقى طالع وشي عامل زي مكون كنت في خناقة بس اهو إفراج..

الكلية مش وحشة ولا حاجة بس شغل جامد.. أنا صحيح أه لعبي و بحب العك.. بس مبحبش التخلف صراحة.. يعني ربنا كارمني بكلية محترمة.. طب مقعد أسمعلي كلمتين ينفعوني.. و مبحبش أطلع مهندس حمار ... و كليتنا بقى المجهود فيها جامد .. معرفش ده حاجة غير الكليات التانية ولا لأ بس مبدأ علم نفسك بنفسك ده صعب عليا..يمكن لأني متعودتش عليه..بس يلا أدينا بننضف الدماغ..


*****************

خلصت المحاضرات و الضحايا خارجين و أنا متنح مكاني
سامح بذكاء متناهي: هو في محاضرة تاني ولا ايه

و فطسنا من الضحك

جمال الشهير بجيمي: اه يبني الدكتور خارج بس يجيب ورق الكويز و راجع تاني استنانا انت هنا و احنا رايحين نجيب حاجت من الكافتريا و راجعينلك
سامح الغلبان صدق: طب جيبولي معاكو فشار
ضحك هستيري
إسلام: قوم يا حبيبي روح انت مش حافظ الجدول
سامح ابتدى يستوعب: انتو فايقين بقى
أنا: سامح يا حبيبي سبحان الله أنت طول المحاضرات كلها نايم و بتصحى أول مالدكتور يخلص، متنام في بيتكو و تخلصنا
سامح: يا عم أنا ببقي بريح دماغي بس ببقى سامع
أنا: يلا يا جماعة نمشي ده هيشلني
سامح: انت مروح فيصل ولا هرم.
أنا: أنت مروح ايه؟
سامح: هرم
أنا: يبقى أنا فيصل سلام يا سامح

**********

أنا: شباب ايه ايه رايحين فين؟
إسلام: رايحين السيما يا عم، هنكون رايحين فين مروحين
طارق: على فكرة العشاء قربت و مصليناش المغرب.
أنا: أنا بقول كده بردو.
جيمي: أوك يلا نصلي.
ياسر: طب أنا ماشي يا شباب عشان في ناس مستنييني
سامح: خدني معاك أنا هصلي في البيت بقى
روحنا نصلي و إسلام مشي معانا في صمت.. لازم الواحد يكسفه يعني
و بعد الصلاة أماني - و دي تبعي - و شلتها خارجين من الكافيتيريا
و طارق لما شافهم جايين: أنا هخلع أنا بقى
\\ طول عمره مبيحبش يقف مع بنات
أماني: نديم
\\ يالهوي لما بتنده عليا بحس إن اسمي اختلف يا جدعان و عملت نفسي مش سامع عشان تقول نديم تاني
أماني: نديييييم
أنا: أهلين
ابتسمت و قالت: ازيكوا يا شباب
\\ طول عمرك تقيلة و طبعاً باصصلها بصه الاهبل
أماني : مين طالع الرحلة يا جماعة؟
و طبعاً شلتي شلة المقاطيع كلها طالعة
أنا : كلنا وانتو
أماني: أنا احتمال
نهلة: شووور
هنا: بفكر افكسلكو انتو أصلاً عيال خنيقة
أنا : و انتي بت تنكة
هنا: أنا بردو اللي تنكة متبص لنفسك
أنا: اتلمي بدل محدفك باللاب
هنا: متقدرش
إسلام: يخربيت أم التناحة أنا ماشي يا عم انتو رايقين بقى
جيمي بيغمزلي : جاي معانا ولا القعدة عجباك هنا
أماني ابتسمت و قالت : يلا روحوا بقى سلام

\\ تقيلة تقيلة يعني مش أي كلام


***********

رجعت البيت بمنظر صعب، و قلت أنا لو ماما شافتني ممكن تتبرا مني..

ايييييييه القرف ده اقف عندك

أنا: اوبااااز و اهي شافتني
ماما: ايه اللبس المبهدل ده انت نزلت كده انت عايز تفضحني

\\يا جماعة أنا مش مبهدل ولا حاجة بس ماما حساسة حبتين

أنا و حاطط ايدي على قلبي: جميلة مدت ايديها في الغدا
ماما: أنا زهقت منك نفسي مرة أحس إنك ابني..أنا مصممة أزياء يابني البس عدل على الأقل
أنا : ماما أنا جعاااان
ماما: الأكل عندك
أنا: جميلة فين؟؟

ماما بابتسامة غير مريحة اطلاقا: خلصت طبيخ و بتاكل روح كل معاها
\\يععععععع
أنا : لأ أنا أصلاً عايز أنام تعبان أوي هصلي و أنام


******************

صليت و فتحت الفيس و المسنجر و تويتر و كل و أي حاجة ممكن أماني تفتحها و قعدت مستني لحد ميظهرلها كومنت و لا ستيتس و لا أي اكتيفيتي لحد منمت جمب اللاب لا أماني فتحت و لا انا عملت ولا أسيمنت


إلى اللقاء في حلقة تانية