عودة ومعى ضيفى المميز جدا محمد الشربينى
المرة دى ح اقدملك مشروبى المفضل
كيف ومتى عرفت بوابة الثانوية العامة
عرفتها من وانا فى اولى ثانويى يعنى تقريباً من 6 سنين لكن مكنتش بدخل بشكل دائم وكان ليا عضويات كتير
وفى الاخر شاركت بالعضوية دى بجدية الحمدلله
وعرفتها عن طريق البحث عن حاجات خاصة بالثانوية
رايك فى منتدى بوابة الثانوية العامة من خلال الادارة .. المشرفين
ناس مجتهدة وبتعمل عمل تطوعى ونفسها تشوف المنتدى احسن منتدى فى الدنيا وبيعتبروة بيتهم الاول مش التانى ربنا يبارك ليهم جميعاً يارب
فى سطور .. كيف كانت رحلتك من اللون الاسود ولونك الحالى مع ذكر اجمل المحطات فيها
انا أسرع مشرف اتعينت فى تاريخ بوابة الثانوية فى الفترة الى كنت فيها
كنت فى يوم داخل اتفرج لقيت خناقة بين القلة المندسة ودى كانت مجموعة هنا اسلام واحمد رضا والسادات ومحمود طه وزينب ونسمة ومها ويمان و ولاء وياسمين وناس كتير جداً بس مناضلين بجد وكان مدير المنتدى وقتها أشرف عبقرينومان وكانوا بيتخانقوا معاة وهوة بيرد علية ببرود وبغباء فأنا دخلت معاهم واتحولت لطرف فى الموضوع فهوة وقفنى فهما كلهم عملوا مشاكل عشان ارجع فرجعت وبدأت اكون مناضل واتخانق يومياً مع أشرف فحب يضحك عليا فعينى مشرف قسم الهواتف النقالة وانا لسة تقريباً بـ 100 مشاركة وطبعاً توقعة كان خطأ لما اتعينت مشرف خناقاتى معاة زادت فعينى مشرف على قسم تانى ( شروحات الحاسب ) وبردة خناقاتى معاة زادت فحب يكسبنا كلنا كنت انا فى الوقت دا 510 مشاركة بالظبط وهند 635 مشاركة ومحمد نصر 1512 مشاركة ومحمود طة 2000وشوية مش فاكر كمان
فطبعاً كان هوة زكى فى النقطة دى احنا كنا بنتخانق معاة عشان التعينات الخطأ فى الادارة فلما عينى انا وهند فأحنا نعتبر تعينات خطأ لاننا لسة مكملناش 650 مشاركة فبدأت الخناقات تبقى بينى انا وهند وبين محمود طة والقلة المندسة اتقسمت شوية معانا وشوية مع محمود
المهم فترة والموضوع اتحل بينا وبدأنانحارب اشرف بقى بجد لاننا عرفنا عنة بلاوى مع بنات هنا وبنات صغيرين وبدلائل المهم الاستاذ محمود سرحان ربنا يكرمة تدخل فى الوقت المناسب الى كان ممكن يؤدى الى انفجار ورفع أشرف وعين صوت الحق مكانة وصوت الحق والاستاذ محمود على تعينى انا نائب ادارة وقتها ومازلت حتى الان دا طبعاً بأختصار شديد :D
احب الاقسام الى قلبك فى المنتدى بصفه عامه
قسم التنمية البشرية
ما حجم المجاملات التى يمنحها او تمنح
حسب الموقف لكنها مش كتيرة بيقولوا انى رسمى شوية
هل لديك خطه لتطوير بعض الاقسام
لو معنديش خطة مستقبلية يبقى وجودى فى الادارة خطأ
فأكيد ان شاء الله مجهز خطة لـ الاقسام كلها ولـ المشرفين كمان
وربنا يقدرنا ونقدر نعمل حاجة كويسة
قسم تحلم بوجوده داخل المنتدى
قسم تقنى تطويرى خاص بالمواقع ويكون لة زوار متخصصين بجد
ماذا يعنى لك الرفع باسم المنتدى
حفظ للحقوق وأحترام للكاتب وللمنتدى وأعضاء المنتدى جميعاً
احب موضوعاتك الى قلبك
كان موضوع كتبتة زمان كان اسمة حكاوى تاريخية مكملتوش هنا لان مكنش علية اقبال لكنى كملتة على جهازى
من وجهة نظرك .. اى الاقسام لاقت نجاح وكانت من اسباب شهرة المنتدى
كل الاقسام من أسباب شهرة المنتدى لكن اكيد بلا شك القسم الاكبر هوة القسم التعليمى وتحديداً الغرف الصوتية
مع من تختلف داخل المنتدى وما الاسباب
حالياً لا احد
هل عشت صراعات داخل المنتدى وما هى نتائجها
مش صراعات بمعنى الصراعات لكنى عشت خناقات كتير احدهم وصل انى روحت لواحد البيت انا وناس اصحابى من هنا عشان نضربة :D
كيف تتعامل مع منافسيك اذا وجدوا
بنفس تعاملهم معايا مع الحفاظ على تشغيل العقل فى كل المواقف
منذ دخولك اللجنه الفنيه .. هل اضافت اليك واضفت اليها
لجنة فنية اية ؟
عندما يتم طرح اقتراح .. هل تكون مع رأى الاغلبيه ام لك رأيك المنفصل حتى لو ضد الاغلبيه
مش برتبط برأى حد ودايماً بيكون ليا رأى خاص بيا وبكون واخدة عن اقتناع بناء على اسباب ودلائل ومن المستحيل رأى يتغير الا اذا اقتنعت بأسباب ودلائل اخرى اقوى مما معى
هل شعرت بالظلم داخل المنتدى
لا الحمدلله نهائياً
كم مره فكرت بالاستقاله واذا كان نعم لماذا عدلت عن الفكره
كتير بصراحة لكنى دايماًبعدل عن الفكرة لان سبب استقالتى بيكون اتحل مش اكتر يعنى
متى ستقول ساكتفى ويكفينى ما حققت
فين ؟
لو هنا فى المنتدى فدة هيكون لما الاقى حد اسلمة المنتدى واحس انة بجد هيطورة
اما فى الحقيقة فلما احسانى حققت حلمى وانى عملت حاجة مفيدة لدينى ولوطنى ولـ اهلى ولنفسى
رتب اولوياتك
دينى
وطنى
اهلى
شغلى
كليتى
علاقاتى العامة
حياتى الخاصة
تابعونا
|