[حووور الجنة]

سلامووو عليكم يا أجمل الاعضااااء

الحـــــــــــــلقة الـــــــــــــــرابعـــــــــــــــــــــــــــــ ــــــة


انهاردة لاحظت إن الإمام اتغير.. و الراجل اللي بيخطب ده مش غريب عليا.. شكله ابن الإمام..غريبة أوي.. و قضيت وقت الخطبة كله عمال أسأل نفسي يا ترى الإمام مجاش ليه ده من و أنا صغير مغابش ولا جمعة..أنا فاكر كان مرة جه و هو تعبان أوي.. و كان مش قادر يقف.. ياااه الراجل ده مفيش حد في المنطقة مش بيحبه.. كان كل مزعل أنا و بابا .. و بابا يحب يصالحني من غير ماخد بالي يكلم الشيخ أحمد و يقوله يكلمني.. كان عارف إني مبعرفش أرجعله كلمه.. ما هو وشه فيه طيبة مشوفتهاش قبل كده و نور جميل، و كلامه بيدخل قلبي من غير استئذان.. طول عمره نفسه أوي إني ابقى حد كويس .. بس أنا كتير بهرب منه أو من مواجهته،، بالرغم من إني بحبه أوي..معرفش ليه..أو يمكن أعرف...




و قطع تفكيري صوت الإقامة.. و بردو معرفتش ايه اللي خلا الشيخ مجاش!


و في الصلاة قرأ الإمام






{وَجَاءَتْ سَكْرَةُ الْمَوْتِ بِالْحَقِّ ذَلِكَ مَا كُنتَ مِنْهُ تَحِيدُ * وَنُفِخَ فِي الصُّورِ ذَلِكَ يَوْمُ الْوَعِيدِ * وَجَاءَتْ كُلُّ نَفْسٍ مَّعَهَا سَائِقٌ وَشَهِيدٌ * لَقَدْ كُنتَ فِي غَفْلَةٍ مِّنْ هَذَا فَكَشَفْنَا عَنكَ غِطَاءَكَ فَبَصَرُكَ الْيَوْمَ حَدِيدٌ}






و بدأ الإمام صوته يتملي بالبكا،، و شوية و الناس ابتدت تتأثر و تبكي.. هو في ايه!!






و أول ما الصلاة خلصت فهمت في ايه لما ابن الشيخ أحمد أعلن بصعوبة بعد ما قدر يستجمع صوته من العياط في الميكروفون إن الشيخ مات امبارح!! و بدأت الناس حواليا تبكي..





أنا مش مصدق!! مش فاهم!!




يعني ايه!!



مات!!







غصب عني لقيتني ببكي زي الأطفال الصغيرين.. يمكن أنا حاسس دلوقتي إني فقدت أبويا..يااااه أنا كنت بحبه أوي.. كنت بحس إن الدنيا بخير لما بشوفه.. كنت بحب دعاؤه للناس و عيونه مليانة دموع الحب ... كنت بحب رقة قلبه في التعامل مع الناس.. خوفه من ربنا لما كان يقرأ آية عن العذاب .. حبه لربنا و كلامه عنه ... فرحته لما كان شباب شارعنا يعملوا حاجة كويسة .. و ازاي كان ليه مع كل واحد ذكرى حلوة .. ياااااه، معقوله مش هشوفه تاني!





و ابتديت افتكر كل حاجة.. و افتكرت إنه كان آخر جمعة كلمني و قالي إننا عايزين نتكلم و أنا طنشت... يا ترى كان عايز يقولي ايه..






من كتر العياط محسيتش بنفسي ولا بالناس حواليا ..معرفتش قعدت اد ايه... محسيتش حتى إنهم صلوا الجنازة و مشيوا و مسحت دموعي و بصيت حواليا ملقتش حد واقف إلا بابا..





كان واقف يبص عليا من بعيد.. و كأنه مستني.. أول مبصتله لقيته ابتدي يقرب


و اخدني في حضنه ... ياااه أنا محتاج الحضن ده أوي... و فضلنا ساكتين و بعدين قطع الصمت بابا و قال





بابا: أنا مش فاهم أنا مش مالي عينك ولا ايه ياد انت





أنا: الله يرحمه، كان طيب.. ......هيوحشني





بابا: يابني الراجل ده أنا معاشره من قبل مانت تتولد.. و يمكن أنا حزين عليه أكتر منك.. الراجل ده ياما شفت معاه سنين.. و عشت معاه على الحلوة و المرة.. و كان من أعز أصحابي.. طول عمره كان حاطط قدامه رضا ربنا.. عمره مجري ورا الفلوس زيي.. يمكن يابني أنا الدنيا زغللت عيني و نسيت نفسي و أنا داير ورا الفلوس أجيب لأمك و أختك.. بس طول عمري عارف إن عمك أحمد اختار الطريق الصح ، لعل يا بني ربنا يهديني أنا كمان.. انت عارف يا بني زمان أول مخلفتك و كان عمك أحمد خلف ابنه أنس، كنت دايماً أحسده بالرغم إن دخله قليل إلا إن ربنا كان بيباركله في رزقه و طول عمره عايش راضي.. أما أنا كنت داير زي التور لا عارف ارضى و لا ارضي أمك و أختك ولا أسد طلباتكم.. كان دايماً يكلمني عن التوكل على ربنا،، و طاعته.. كان يقولي اطلب من ربنا يباركلك في رزقك..




\\ بابا لاحظ إن كل ميتكلم عنه أنا أتأثر أكتر فسكت




بابا: الله يرحمه، مش يلا نروح بقى يا بطل



*****************

في البيت



جميلة: نودي، نودي ..حزر فزر مين على التيليفووون





أنا: مش رايقلك ، قوليله هكلمه بعدين




جميلة حطت سماعة التيليفون على ودنها: أيوا يا أماني، معلش هو..




و لحقتها قبل متتكلم كلمة زيادة




خدت التلفون و دخلت الاوضة




أنا: الو


أماني: ايوا يا سيدي، ايه كل ده في صلاة الجمعة و لا روحت فيين


أنا: لا أبداً كان في صلاة جنازة و كده


أماني: نديم، مالك؟


أنا: ولا حاجة مخنوق شوية..


أماني: لا بجد في ايه؟


أنا: واحد صاحب بابا كنت بحبه مات.


أماني: البقاء لله


أنا : و نعم بالله


أماني: طب خلاص هنأجل كلامنا بعدين لحد متروق


أنا: ماشي،سلام


أماني:سلام



*****


قفلت التيليفون و بفكر يا ترى كان عايزني ليه؟ مش يمكن كان عايز يكلمني إني أبطل كلام مع بنات.. أنا فاكر مرة كانت هنا اتصلت بيا قدامه و قعدت اهزر معاها.. بس عاتبني بعدها بعتابه الهادي الجميل ..




أو يمكن بابا قاله إني بحب أماني، و هو كان عايز ينصحني أبعد عنها و أعتبر إنها أختي.. كان مرة قالي زي مانت بتغير على أختك غير على بنات الناس..



ياااه ،، مش عارف أنا محتار أوي.. مش عارف بقي.. قررت أدخل أشتغل شوية.. و عشان أكون صريح مع نفسي


أنا بهرب مني!!




****


جميلة: شاطر بس تقولي مش رايقلك يا جميلة و عمال تحبلي في التيليفون





أنا: ابعدي عني بحوافرك دي ..عايزة ايه


جميلة: لا ولا حاجة .. أصل يعني....


أنا: هفضل مستني كده كتير.


جميلة: أصلي يعني يا أبيه..


أنا: أبيه ! !!





جميلة: كنت عايزة أقولك


أنا: انتي هتتكلمي و لا ألحوسلك البتاع اللي حطاه على دقنك ده.. انتي بتحلقى دقنك خلاص





جميلة : من الآخر بقى ، أشرف عايز يتقدملي و أنا عايزاك تقنع بابا


أنا : نااااااعم يا عيون أبيه.. أشرف ده الواد الأهبل اللي جه الخميس اللي فات في فرح بنت طنط هويدا؟؟




جميلة مسكت المخدة و استخبت وراها




جميلة: بالراحة يا نديم.. و بعدين متشتمش شوشو


أنا : شوشووو! هي كمان بقى فيها شوشو




مسكتها من شعرها المطاط ده يععععع




أنا : أنت عارفة لو ممشيتيش من وشي دلوقتي هحلقلك زيرو و أشوف سي شوشو بتاعك ده هيعبرك بعد كده ولا لأ..



و خرجت جميلة من الأوضة و هي بتعيط


\\ و كمان بتعيطي،، أنا قلبي موجوع أصلاً متجعهوليش زيادة..



رجعت تاني




جميلة: على فكرة بقى أنا أختك الكبيرة انت نسيت نفسك ولا ايه.. و أشرف هيتقدملي و بابا هيوافق و لو مش عايز تحضر فرحي براحتك.. و كمان لو تحب مش هخلي عيالي يقولولك يا خالو..


أنا: انت لحقتي تخلفي!! الله أكبر أنا بقيت خالو و أنا قاعد ؟!





جميلة: واضح إن انت مش رايق..


أنا : جميلة، ممكن نتكلم بعدين انتي عصبتيني دلوقتي بشوشو ده..اهدى و بعد كده نتكلم



و مشيت الحمد لله





يعععععع القرف اللي في ايدي مطرح شعرك.. هي دي الصبغة،، دي صبغة يود دي ولا ايه..


و أشرف ده هيستحمل اللي بتعمله ده!! يلا خلينا نخلص





********



ماما: أختك خارجة بتعيط ليه يا نديم


أنا: عادي يا ماما يعني اتخانقنا


ماما: بقولك ايه بقى أنا بقالي ساعتين بجهزلها في الكريم اللي هي حاطاه، و لو زعلت ممكن تسخن و الكريم يسيح يا حبيبي..يلا قوم صالحها


أنا: حاضر




******




دخلت اوضة جميلة اللي بقالي كتير مدخلتهاش.. ياااه ايه النضافة و الحلاوة دي


جميلة: عايز ايه؟


أنا: هي كلمة وحدة و ضرب قفاها، ممكن أقابل سي شوشو ده بكرة في النادي و بعد كده أقرر إذا كنت أكلم بابا ولا لأ..


جميلة: بجد ؟


أنا: للأسف


جميلة: أنا بحبك أوي بجد .. أنا عايزة أبوسك


أنا: لأااااااااااااااا ، ابعدي عني بالتين الشوكي اللي على وشك ده، و إلا هرجع في كلامي



و مشيت بعد ما بالي استريح إنها خلاص مش زعلانة....دلوقتي بقى اشتغل شوية .. فكلية الحاسبات لا تخلو من التسليمات....

************

السبت 9 صباحاً


جميلة
( واقفة فوق دماغي )
جميلة: ندييييييم، نودي حبيبي ..اصحى اتأخرت

أنا: أنا أجازة انهاردة ، معنديش كلية انت عارفة
جميلة: مش انت وراك معاد مهم انهاردة

أنا: معاد!! معاد ايه.. سيبيني أنام يا جميلة بقى
جميلة: نديم بقى، معادك مع أشرف
أنا: ده بليل يا جميلة اصحى دلوقت اعمل ايه
جميلة: يا سلام يعني هو انت مش هتجهز!!
أنا: اجهز من 9 الصبح عشان اقابله 8 بليل!! ليييه هو أنا اللي هتجوزه!!
جميلة : لا بجد لازم تظبط نفسك
أنا: بت انتي بطلي هبل .. عايزاني اشقرلو رموشي و لا اعملوا ماسك بطاطا .. انت لو متعدلتيش هسيبه قفاه يقمر عيش في النادي
جميلة: طب قولي هتلبس ايه..
أنا: هو بيحب اللون الايه
جميلة : ايوا كده انت كده فوقت ، ثواني و اعملك الفطار يا حبيبي

\\ ربنا يشفيكي

*********

مش عارف ليه أشرف ده مبينزليش من زوور.. دماغه تافهة زي جميلة .. و بعدين مش عارف.. مكنتش أحب إن جميلة تتجوز بالطريقة دي.. يعني بقالهم سنتين بيحبوا بعض،، مش عارف عندي احساس إنه ممكن ميقدرهاش، أو يفتكرها مش غالية.. بس ماهو أنا بحب أماني، يا ترى أنا مبحترمهاش، يا ترى أنا ساعة الجد ممكن أسيبها.. يا ترى هي بتحبني أصلاً...

جميلة: الفطار

أنا: انت اللي عاملاه

جميلة: اها

أنا: طب كلمي أشرف قوليله ينفع نتقابل في المستشفى؟


*******

و عشان الست جميلة متزعلش،، عصرت على نفسي كيلو ليمون و لبست بدلة و أنا رايح النادي..

يلا خليهم يشبعوا ببعض
أشرف: بش مهندس نديم ازيك
أنا: أهلاً
أشرف: اتفضل حضرتك تشرب ايه؟
أنا: لا .. مشربش
أشرف: ياريت مكونش معطلك
أنا: في الحقيقة أنا مشغول أوي يا ريت ندخل في الموضوع
أشرف: أنا كنت عايز اتقدم لجميلة و كنت عايزك تكلم والدك في الموضوع
أنا: طب مش لما أوافق الأول
أشرف: طب و انت معترض ليه

\\ مش نازلي من زور اعملك ايه

أنا: اشمعنى يعني جميلة
أشرف: مانت عارف إننا بنحب بعض من زمان ، و كنت مستني اتخرج عشان اتقدم

\\ أكيد متعرفش شكلها يوم الجمعة


أنا: بتحبها من زمان .. بص اضمن منين أنا إنك تسعدها
أشرف: سؤال غريب!!

\\ اوف أنا زهقت

أنا: طيب إن شاء الله هحاول مع بابا و ربنا يقدم اللي فيه الخير، هستأذن أنا بقى عندي مذاكرة و شغل و تسليمات بقى و انت عارف..سلام
أشرف: سلام :|

\\ ايه ده أنا مش متخيل ازاي قلبي مقبوض من الجوازة دي.. هقنع بابا ازاي أنا.. و لو كلمت جميلة ممكن تقلبها نكد


**************


في البيت جميلة كان ناقص تستناني على اوكرة الباب
d:
جميلة : ايييه
أنا: كله تمام
جميلة : اتفقتوا
أنا : طبعاً
جميلة: مش فاهمة ايه اللي حصل
أنا: هكلم بابا و سيبيني أناااااام دلوقتي ممكن.
جميلة: حاضر!!!!!
\\ أول مخرجت تيليفوني بيضرب.. ده طارق



أشوفكم في الحلقة الجاية