اقتباس:
المشاركة الأصلية كتبت بواسطة سحر العلوم
السلام عليكم
بصراحة مش فاهمة اخر تعليق يا د. عبدالرحمن
يعنى حملة الماجستير والدكتوراة هيعينوهم ولا ايه بالظبط ؟
ممكن توضح اكتر بليز
لام الموضوع ده يهمنى جدااااااا
وشكرا
|
السلام عليكم يا أخت سحر:
دلوقتي أنا هعيد نشر توضيح نشرته سابقا يلخص موضوع التعيينات بالكامل
ويتضمن رد لسؤالك:
1- بالنسبة لتعيين الأوائل هيكونوا العشرون الأوائل على الكلية بالكامل وليس على كل قسم وبكده هتلاقوا أقسام بيتعين منها كتير وأقسام قليل وأقسام لأ..
2- التعيينات هتكون من دفعة
2003 -2010 .. والتعيينات هتكون في وظائف إدارية بالدولة (
مش كأعضاء هيئة تدريس) في الجامعات ودي نقطة مهمة بأكد عليها وهارجعلها في الآخر واوضح السبب ..
3- يعني إيه الهيكل الإداري في الدولة يعني في المصالح الحكومية .. زي الانت مثلا خريج آداب مكتبات .. تتعين أمين مكتبة في المكتتبات العامة أو تتعين في قصر الثقافة وهكذا.. طيب احتمال الأعداد تكون أكبر من الوظائف المتاحة .. يبقى الجامعات هتستوعب عدد منهم
كموظفين يعني موظف في رعاية الطلاب أو في شئون الطلبة أو في الإدارة المركزية أو في مكتبة الكلية أو في السكرتارية وهكذا...كمان ديوان عام كل مافظة هيستوعب بعض الأوائل ويعينهم فيه كموظفين إداريين..
4- والتعيينات يا جماعة هتكون على الدرجة الثالثة التخصصية مباشرة وليس كعقد قابل للتثبيت بعدج ذلك..
5- بالنسبة للأخت بتاعت 2002 أحب أبلغها إن دفعتك اتعينت منذ تخرجها طب انت ليه لأ؟!!! احتمال حضرتك الأولى على قسمك آه بس مش من ضمن العشرون الأوائل على جميع الكلية وده وارد .. طيب انا من العشرون ومتعينتش .. احتمال يكونوا بعتولك ع الكلية علشان تملي رغبات التعيين وحضرتك موصلكيش خبر فعلشان كده استبعدوك.. واحتمالات كتير .. بس المهم لو حضرتك لسه متمسكة بفرصتك يبقى ما عليكي إلا بفاكس بجنية وارسليه على وزارة التعليم العالي بلغيهم انك من دفعة 2002ومن الأوائل وترتيبي كذا على كل الكلية وتم تخطي تعييني وهيدرجوا اسمك ضمن الناس صدقيني ومتهمليش.. الحمد لله انا كنت من ضمن من قابلوا السيد وزير التعليم العالي شخصيا وأثروا في قراره بزيادة تعيينات الأوائل بعد أن كانت قاصرة على دفعات 2006-2010لتشمل دفعات 2003-2005 ايضا..
6- بالنسبة لمسابقة التعيينات الخارجة عن الأوائل واللي تم الإعلان عن أنها سوف تشمل 130 ألف خريج تاني .. طبعا ده موضوع كان بيحصل وتم ايقافه .. وبتبقى مسابقة عامة بتنزلها الوزراات مع التنظيم والإدارة والتقديمات فيها بتكون إما في ديوان المحافظة أو في المديريات المعنية في كل محافظة ومعايير الاختيار بتكون الأعلى مؤهلا ثم الأعلى تقديرا ثم الأكبر سنا ..
7-بالنسبةلتعيينات الأوائل في التربية والتعليم خريجي كليات التربية يتم تعيينهم في الإدارات المختلفة كمعلمين مساعدين لحين اجتيازهم اختبار الكادر فينتتقلون لوظيفم معلم .. بس الفرق أصبح إيه؟!!! المطلع على قانون رقم 155 لسنة 2007 الخاص بتنظيم الكادر وترتيب وظائف التربية والتعليم ينص على أن وظائف التعليم الثابتة هي : (
معلم مساعد-معلم-معلم أول-معلم أول أ -معلم خبير -كبير معلمين) ... وهذه هي الدرجات الوظيفية الثابتة لكن الخطأ كان إن المعلم المساعد قبل الثورة مربوط بتعاقد مميز مشروط الن المعلم المساعد ثابت لحين اجتيازه اختبار الكادر يعني محدش يعرف يقولك مع السلامة .. وكمان الوزير د.أحمد جمال الدين في صدد إصدار قرار بعقد امتحانات الأكاديمية 3 مرات سنويا .. ودراسة أن يسبق الامتحان دورة تأهيلية تعقدها الوزارة .. يعني سعادتك تتعين على درجة معلم مساعد وتمتحن الكادر بعد تعيينك بـ 3 شهور بالكتير وتنتقل لدرجة معلم على طوووول..
8- نرجع لموضوع التعيين كأعضاء هيئة تدريس بالجامعات يعني وظائف (
معيد-مدرس مساعد-مدرس) أحب أوضح نقطة هامة جدا مسببة اللغط ده..
من ضمن أوائل الخريجين فيه ناس اسمهم طلاب المنح الدراسية ودول المعروفين باسم (
الباحثين ) ودول ناس كانوا الأول أو الثاني أو الثالث مثلا على دفعته وماتخدش معيد فالجامعة أعطته منحة لمساعددته لاستكمال دراساته العليا وشرطت عليه عدم العمل الحكومي أو الخاص خلال مدة المنحة .. وفيه ناس حصلت على المنحة لاستكمال الماجستير ومخلصتوش لغاية دلوقت وفيه ناس خلصت الماجستير وفيه ناس خلصت الماجستير وأخدت منحة لاستكمال الدكتوراة كمان ..
الناس دي سيتم تسكينهم في الجامعات كأعضاء هيئة تدريس وفقا لاحتياج الأقسام .. يعني اللي واخد منحة ماجستير وماخلصهاش يسكن على درجة
معيد .. واللي خلص الماجستير من المنحة يسكن على درجة
مدرس مساعد .. واللي خلص دكتوراة من المنحة يسكن على
درجة مدرس ... يعني هيدعموا الجامعة من الناس اللي الجامعة بتصرف عليهم لاستكمال دراستهم العليا مش هيجيبوا حد محضر على حسابه أو حد لسه خريج وقاعد في البيت علشان يدعموا بيه الجامعات ويسيبوا الناس اللي صرفت الدولة عليهم وترميهم في الشارع .. وعلى فكرة ده نص كلام الدكتور عمرو عزت سلامة وزير التعليم العالي في برنامج صباح دريم أول أمس (
حملوه من اليوتيوب) وهو نفس ما أكده الوزير خلال اجتماعه معنا الأسبوع الماضي ..
وطبعا اللي يحب يتأكد يقرأ نص
الفاكس الأخير المبعوت للجامعات والذي يشدد على مايلي :
إرسال أسماء الـ20 الأوائل على كل الكلية دفعات 2003-2010 .. على أن يتم استبعاد الأسماء التي تم تعيينهم كمعيدين منهم .. وضرورة إرسال أسماء طلاب المنح الذين حصلوا على منح دراسية من الجامعة وأنهوها بنجاح وحصلوا على الدرجة العلمية سواء كانت ماجستير أو دكتوراة (ودول أسمتهم بعض الجامعات بالحاصلين على درجات علمية أعلى) وطبعا اللي هيقرأ خبر تعيين الأوائل في الأهرام أو الجمهورية أو الأخبار أول ما طلع أكد على عمل حصر لأوائل الجامعات وحصر المنح التي بالداخل والخارج إرجعوا للمصادر علشان عضويتي لا تسمح بوضع روابط كنت أدعم كلامي بالمصادر..
أتمنى أكون وضحت وجهة نظري وأن تكون الفائده عمت ..
وشكراااااااا لاهتمامكم ..... وأرجو التواصل ....
د.عبدالرحمن المنياوي