[احمد رضا]

السلام عليكم و رحمه الله وبركاته


ازيك ياتيمو؟ عامل ايه يا جميل ؟


يارب تكون بخير

-----


بص يا سيدي بالنسبه لمشكلتك التانيه ( الأولي لسه في مجال المناقشه )

انا دلوقتي هطلع اجزاء مشكلتك عشان نبدا نحلها واحده واحده

1- حاسس انك متضايق و مخنوق من كل اللي حواليك ما عدا صحابك بصفه عامه
2 - عندك في طبيعتك انك مش عايز تظهر ضعيف في انك تبين اي نوع من المشاعر قدام الناس
3 - عايز تبعد عن كل حاجة في حياتك و تعيش فترة من الوحده
4 - مش عارف ايه السبب في انك تزعل و تتخنق
5 - بتفكر في المستقبل كتير
6 - بتشوف احوال البلد و بتحاول تطبق اللي انت شايفه في مستقبلك و شايف انه هيكون مش كويس
7 - مش عارف لو مت هتقابل ربنا ازاي
8 - مخنوق من البلد و اللي فيها

تعالي بقه نفكر في حلول لمشكلتك يا تيمو

حاسس انك متضايق و مخنوق من كل اللي حواليك ما عدا صحابك بصفه عامه

بص يا تيمو غالبا الانسان بيحب اللي يفهمه و ممكن يعيش طول عمره يدور علي حد يفهمه و يقدر احاسيسه و مشاعره .. الحكايه معاك كدا تمام
انت مفتقد الناس اللي تفهمك في البيت .. بمعني اصح ان بينك و بين والديك و اهلك فجوه معينه في التفكير .. وعلي فكرة ده شئ طبيعي جدا لان الزمن غير الزمن
مش سهل انهم يفهموا انت عايز ايه بالشكل الكامل و الطريقه اللي انت تتخيلها
هيكون في قصور .. و ده مش عيب .. دي مجرد نتيجه منطقيه
انت شايف في اصحابك اللي مش شايفه في اهلك
بمعني انك شايف انهم بيفهموك
لو عندك موهبه بيقدروك
لو فيه احاسيس بيعشوها معاك
ودي مش حاجة غير عاديه علي فكرة
دي برده نتيجه منطقيه نظرا لتقارب المرحله السنيه اللي انتوا عايشين فيها
وعلي فكرة مشكلتك دي حلها انك تصبر لان الفترة دي هتمر فيها بمشاعر كتير جدا و اضطراب و تشتيت
------

عندك في طبيعتك انك مش عايز تظهر ضعيف في انك تبين اي نوع من المشاعر قدام الناس

لو انت بتداري حزنك عشان متحملش حد همك .. ده قمه النبل منك
لكن لو بتداريه عشان بتكابر انك شخص رقيق و بتحس
دي قمه الخطأ
اوعي تفتكر انك لما تظهر مشاعرك تبقي انسان ضعيف او انك صغير و عقلك صغير
بالعكس
انت لازم تعيش حياتك زي ما انت عايز
مش زي ما الناس تعوز
مشاعرك اظهرها
رقيق اظهرها
الجنتله و الاحترام في الكلام عادي اظهرها
زعلك و خنقتك عادي احكي مع اصحابك و خليهم يعيشوه معاك
احكي مع ربنا .. قرب منه .. المهم انك متكتمش في نفسك
واللي مش عاجبه طريقتك يا سيدي ميتعاملش معاك
بمعني .. دور علي اللي يقبلك بصفاتك دي
مقابلكش البشر مالين الدنيا

----------------

عايز تبعد عن كل حاجة في حياتك و تعيش فترة من الوحده

لو انت شايف ان ده حل المشكلة فانت تبقي غلطان جدا
ان تفكر لوحدك يبقي انت معملتش حاجة
هتقولي بعتمد علي نفسي في التفكير
هقولك يبقي مش هنتج اي حل لمشكلتك

ومهما كان الحل اللي ممكن توصله من تفكيرك انت لوحدك
مش هيكون زي الحل لما تفضفض و تقول اللي جواك و تسمع آراء الناس

4 - مش عارف ايه السبب في انك تزعل و تتخنق

زي ما قولتلك
فترة المراهقه دي معظم الاحاسيس و المشاعر بتاعتها كدا
غير مستقره
ساعات تلاقي نفسك مبسوط اوي و طاير من الفرحة ومن غير سبب برده
وساعات تلاقي نفسك عندك حاله من التضجر
الحل انك تفهم مرحلتك دي ايه مظاهرها
عشان لما يحصلك حاجة
يبقي عندك الاجابه في نفسك
وتقدر تريح فكرك من كتر التساؤل