مشكورة همتى رايتى ، انتى موضوعاتك كلها جميلة وراقية أوى
بس على فكرة كل الاعلام اللى انتى قلتيه كان اعلام حكومى أو اعلام مع النظام القديم ،
علشان كده ماكناش بنصدقه ،
بس الاعلام دلوقتى هو الاعلام اللى بيحبنا واللى كان معانا فى الثورة خطوة بخطوة ،
و اللى كان بيدافع عننا وبيقف معانا .
فاكرة لما كل صحف المعارضة اتكلمت على الثورة ودافعت عنها ،
فاكرة لما نزلوا ميدان التحرير ووقفوا معانا وماخافوش
يبقى مش لازم نكدبهم ، أو انا قصدى مش لازم نكدبهم على طول
يعنى احسن حاجة اننا نتعلم نفكر
و مش أى حاجة نسمعها نصدقها حتى وان كان اللى بيقولها مش كداب ،
لازم نفكر ونعرف
بس أقولك على حاجة انا موافق معاك
ان مش كل السلفيين وحشين و مش كل الاخوان وحشين و مش كل الناس العاديين وحشين
احنا لازم لما نسمع حد نفكر فى كلامه الأول
لو لقينا كلامه كويس خلاص نسمعه ونفكر فيه برده الأول
لازم نفكر قبل مانصدق أو نقتنع بأى حاجة
و مش بس علشان مربى ذقنه ولابس جلابية يبقى كويس
لأن فيه ناس مربيين ذقونهم وبيلبسوا جلاليب قصيرة
بس مش كلهم بيقولوا كلام كويس ، ناس كتيرة منهم بتقول كلام كويس
وناس لأ وبيقولوا كلام غريب أوى ووحش أوى
طيب حأقولك تخيلى أنى شفت على الفيس بوك
واحد شيخ واقف فى مظاهرة وحواليه ناس كتيرة أوى ،
تخيلى كان بيقول ايه
حذرى فذرى
مش حتصدقى والله اللى كان بيقوله
كان بيقول يلا بينا كلنا نروح نحرق كل الكنائس والأديرة اللى موجودة قى مصر ،
تخيلى
عاوز يحرق الكنائس بتاعة اخوتنا المسيحيين
علشان يعمل خناقة بينا وبينهم ، وندخل فى حرب أهلية و نخسر بلدنا
طيب اقول لك حاجة تانية
مش حتصدقينى لما اقولهالك
على فكرة انا مش حأقول قريتها
ومش حأقول سمعتها من حد
بس صدقينى والله شفتها بعينى على النت
و أكيد أنتى كمان وكل أصحابنا شافوها
شفت شيخ مشهور بيتكلم عن البرادعى
تفتكرى كان بيقول ايه
مش حتصدقى ولا أصحابنا حيصدقوا
كان بيخوض فى عرضه وفى عرض بنته
تخيلى آه والله رغم انه شيخ وعارف أن حرام أن حد يتكلم على حد
وعارف انه ماينفعشى نتكلم عن حياة الناس الخاصة
لكن الشيخ دا كان بيشتم فى بنته وبيتهمها انها متجوزة مسيحى
مع ان بنته مسلمة طيب ازاى حتتجوز مسيحى
كلنا عارفين انه ما ينفعشى
طيب علشان ما أظلمهوش
الشيخ دا اعتذر للبرادعى على اللى قاله فى حق بنته
طيب تخيلى بقى لو احنا سمعنا كلامه وصدقناه من غير ما نفكر
أكيد ماينفعشى لازم نفكر قبل مانصدق اى حاجة
********************
معلهش أنا طولت عليكى
ومش قصدى اشتم فى حد
أنا بس عاوزك توعدينى وكل أصحابنا يوعدونى
انهم يفكروا قبل مايصدقوا
وعلشان أصلا نعرف نفكر يبقى لازم أننا نقرأ الأول
حتوعدينى ان انتى وأصحابك فى الاجازة مش حتضيعوا الوقت قدام التليفزيون والنت وبس
لازم حتشتروا كتاب وتقروه
مش مهم كتاب ايه
اى كتاب كل الكتب فيها معلومات وكل الكتب فيها فايدة
مش ربنا بيقول لنا
( إقرأ باسم ربك الذى خلق ، خلق الانسان من علق ، إقرأ و ربك الأكرم ،الذى علم بالقلم ، علم الانسان مالم يعلم
يبقى لازم نقرا علشان نعرف ،
و لما نعرف مش حنخلى حد يضحك علينا
وساعتها حنقدر نميز بين الصح والغلط
و نعرف ايه الأخبار الصح والأخبار الغلط
و تصبحوا على خير يأ خيرة شباب مصر