مشكورة أخى الفاضل على هذا الموضوع القيم، ا
بس على فكرة كل الاعلام اللى كان بيهاجم الثورة كان اعلام حكومى
أو اعلام مع النظام القديم ،
علشان كده ماكناش بنصدقه ،
بس الاعلام دلوقتى هو اعلام الثورة اللى كان معانا فى الثورة خطوة بخطوة ،
و اللى كان بيدافع عننا وبيقف معانا .
فاكرين لما كل صحف المعارضة اتكلمت على الثورة ودافعت عنها ،
فاكرين لما نزلوا ميدان التحرير ووقفوا معانا وماخافوش
يبقى مش لازم نكدبهم ، أو انا قصدى مش لازم نكدبهم على طول
يعنى احسن حاجة اننا نتعلم نفكر
و مش أى حاجة نسمعها نصدقها حتى وان كان اللى بيقولها مش كداب ،
لازم نفكر ونعرف
ببس أقول لكم على حاجة انا موافق معاك
ان مش كل السلفيين وحشين و مش كل الاخوان وحشين و مش كل الناس العاديين وحشين
احنا لازم لما نسمع حد نفكر فى كلامه الأول
لو لقينا كلامه كويس خلاص نسمعه ونفكر فيه برده الأول
لازم نفكر قبل مانصدق أو نقتنع بأى حاجة
و مش بس علشان مربى ذقنه ولابس جلابية يبقى كويس
لأن فيه ناس مربيين ذقونهم وبيلبسوا جلاليب قصيرة
بس مش كلهم بيقولوا كلام كويس ، ناس كتيرة منهم بتقول كلام كويس
وناس لأ وبيقولوا كلام غريب أوى و كلام و حش اوى
طيب حأقولكم تخيلوا أنى شفت على الفيس بوك
واحد شيخ واقف فى مظاهرة وحواليه ناس كتيرة أوى ،
تخيل كان بيقول ايه
حذرروا فذرروا
مش حتصدقونى والله ان ممكن حد عاقل يقول كده
كان بيقول يلا بينا كلنا نروح نحرق كل الكنائس والأديرة اللى موجودة قى مصر ،
تخيلوا
عاوز يحرق الكنائس بتاعة اخوتنا المسيحيين
علشان يعمل خناقة بينا وبينهم ، وندخل فى حرب أهلية و نخسر بلدنا
و آدى النتيجة ، شحن وغضب وخوف من اخواتنا المسيحيين
واعتصامات علشان خايفين ان بلدهم اللى هم شركاء فيها تتاخد منهم
ماهم اخواتنا المسيحيين كانوا معانا فى الثورة
وماتوا علشان مصر تبقى حرة
ودافعوا عنا واحنا بنصلى فى التحرير
يبقى ازاى الشيخ دا يقول الكلام دا
طيب اقول لك حاجة تانية
مش حتصدقونى لما اقولها لكم
على فكرة انا مش حأقول قريتها
ومش حأقول سمعتها من حد
بس صدقيونى والله شفتها بعينى على النت
و أكيد أنتم كمان وكل أصحابنا شافوها
شفت شيخ مشهور بيتكلم عن البرادعى
تفتكروا كان بيقول ايه
مش حتصدقونى ولا أصحابنا حيصدقوا
كان بيخوض فى عرضه وفى عرض بنته
تخيلوا آه والله رغم انه شيخ وعارف أن حرام أن حد يتكلم على حد
وعارف انه ماينفعشى نتكلم عن حياة الناس الخاصة
لكن الشيخ دا كان بيشتم فى بنته وبيتهمها انها متجوزة مسيحى
مع ان بنته مسلمة طيب ازاى حتتجوز مسيحى
كلنا عارفين انه ما ينفعشى
طيب علشان ما أظلمهوش
الشيخ دا اعتذر للبرادعى على اللى قاله فى حق بنته
طيب تخيلوا بقى لو احنا سمعنا كلامه وصدقناه من غير ما نفكر
أكيد ماينفعشى لازم نفكر قبل مانصدق اى حاجة
وكان بيتكلم عن الليبرالية والعلمانية
طبعا من حق أى حد يتكلم و يقول
بس تخيلوا كان بيعرف الليبرالية وبيقول ايه
ان الليبرالية ان أمك ماتلبسى حجاب
و ان الليبرالية أن الراجل يتجوز راجل والست تتجوز ست
تخيلوا .... بالذمة دا كلام شيوخ
طيب مش المفروض أن الشيخ لما ييجى يتكلم فى موضوع يبقى يقرأ الأول
ولا علشان واخد لقب شيخ يقول أى حاجة
يبقى ازاى احنا نثق فى أى حد
********************
معلهش أنا طولت عليكم
ومش قصدى اشتم فى حد
أنا بس عاوزكم توعدنونى وكل أصحابنا يوعدونى
انهم يفكروا قبل مايصدقوا
وعلشان أصلا نعرف نفكر يبقى لازم أننا نقرأ الأول
حتوعدونى ان انا و انتم فى الاجازة مش حنضيع الوقت قدام التليفزيون والنت وبس
لازم حتشترى كتاب و نقرؤه
مش مهم كتاب ايه
اى كتاب كل الكتب فيها معلومات وكل الكتب فيها فايدة
مش ربنا بيقول لنا
( إقرأ باسم ربك الذى خلق ، خلق الانسان من علق ،
إقرأ و ربك الأكرم ،الذى علم بالقلم ،
علم الانسان مالم يعلم
يبقى لازم نقرا علشان نعرف ،
و لما نعرف مش حنخلى حد يضحك علينا
وساعتها حنقدر نميز بين الصح والغلط
و نعرف ايه الأخبار الصح والأخبار الغلط
و تصبحوا على خير يأ خيرة شباب مصر