[Mr. Ali 1]

موضوع ظريف ومواقف مضحكة . بس هو الموضوع للمواقف المضحكة وبس ؟
يعني مفيش تشكيلة
أنا عندي تشكيلة من كل الانواع ( تتكتب في مجلدات لأني كنت شقي جداً جداً جداً )
من زمااااااااااااان وأنا في امتحان الثانوية العامة ( علي أيامي الثانوية كانت 3 فقط )
الدرج بتاعي في اللجنة كان الأخير وجنبي كرسي يقعد عليه الملاحظ .
بعد لما انتهيت من تسطير ورقة الاجابة وجيت أبص جنبي , بصيت وتنحت خالص .
اللي كان علي الكرسي واحدة ست ( تشبه نوال السعداوي ) ولما الملاحظة لقتني متنح لها , قالت ليا مالك ؟ فيه ايه ؟ بتبص عليا كدا ليه ؟ وانا بدون أي تردد شاورت لها علي دقني . ردت وقالت مش فاهمة . قلتلها محلقتيش دقنك الصبح قبل ما تيجي اللجنة ليه ؟ أمواس الحلاقة خلصت ؟ ( دقنها كانت واضحة جداً وأطول من دقني )
طبعاً وشها ضرب ألوان الطيف كلها . قعدت تزعق وتقول خليك في الامتحان ومش عايزة اسمعك بتتكلم خالص . انا مسكتش ورحت مزعق أنا كمان لحد ما مراقب الدور دخل اللجنة وسأل فيه ايه ؟ قلت ينفع تقعد تحل في امتحان ثانوية عامة وتلاقي واحدة قاعدة جنبك ودقنها بالطول دا ؟ المراقب قرب مني وطبعاً هي جنبي وبص عليها وتنح هو كمان . هي قالت له ايه يا أستاذ فيه ايه ؟ انتبه لنفسه وقالي طيب بص في ورقة اجابتك وجاوب . وأنا صممت انها متقعدش جنبي خالص وان اعصابي كدا مش هتستحمل . وفعلاً المراقب طلب منها انها تقعد في مكان تاني . وبعد ما الامتحان خلص وانا بديها ورقة الاجابة قلتلها يا ريت بكرة متنسيش وتحلقي دقنك وشين علي الأقل