انا شايفه ان كل المواضيع كوميديا بس الحقيقه عندى موقف نكد شويه مش قادرة انساه
وانا فى ثانويه عامه كنت شاطرة اوى الحمد لله وكل مدرسينى كانو بيقولو طب او صيدله وانا فعلا كان نفسى ادخل صيدله او هندسه لانى بحب الرياضه جدا
المهم جه وقت الامتحان وعلشان كنت مذاكرة كويس اعصابى كانت هاديه جدا وعدت نص الامتحانات على خير وجه يوم الفيزياء وكنت ايه ممتازة فيها ودخلنا الامتحان وكان صعب جدا لكن الحمد لله كنت بشوف كله جانبى بيعيط وانا متماسكه
وطلعنا بره بنراجع وكان معايابنتين توائم منهارين من العياط ماماتهم بصتلى وقالت طبعا انتى خمسين من خمسين قولتلها لا يا طنط خمسه وجمسين يعنى بضحك والله مش اصدى اخمس فى وشها لانى كنت طيبة جدا
المهم الامتحان اللى بعده كان عندنا احصاء وديه طبعا كانت سهله جدا يعنىكله يجيب الدرجه النهائيه فيها لكن روحت المدرسه لقيت طنط واقفه مستنيانى وبتزعق فيا وتقولى انتى بتخمسى فى وشى انتى قليله الادب
وعلشان انا كنت مؤدبه جدا مقدرتش ارد عليها واعدت اعيط لدرجة انىمكنتش شايفه الاسئلة ودموعى نزلت على ورقه الاجابه
ولما طلعت اكتشفت اخطاء هايفه جدا وده طبعا اثر عليا نفسيا جدا فى الامتحان اللى بعده خصوصا ان امتحاناتنا كانت ورا بعض يوم الجمعه والثلاثاء بس اللى اجازة
وجت النتيجه طبعا فى الفيزياء 48 لكن فى الاحصاء الهايفه 23 من 30 وبعدها الفرنساوى واللى كنت بحبه جدا مش فاكرة لكن نقصت فيه بردو اما فى المواد كلها اللى قبل الفيزياء كانت معظمها الدرجات النهائيه او اقل درجه او اتنين
وبدل ما اجيب 95% جبت 85% وطبعا لاحصلت صيدله ولا هندسه ودخلت تربيه وكل ده بسبب الست ديه ضيعت عليا مذاكرة السنه كلها
ودلوقتى بنسى الموقف ده لكن كلما احسست ان احلامى ضاعت وخصوصا انى كنت ذكيه جدا ومجتهدة افتكر اليوم ده ومش قادرة اسامحها مع اننى تخرجت وتزوجت وانجبت ثلاثة اطفال والحمد لله اعيش حياة سعيدة ولكنى لم اكن اخطط لها
